Árs fangelsi fyrir að hafa ítrekað berað sig fyrir framan börn

Brotin áttu sér stað yfir rúmlega árs tímabil en ákærða var gefið að sök að hafa berað sig í að minnsta kosti fimm skipti. Brotin beindust öll gegn ungum drengjum en sá yngsti var átta ára gamall. Í niðurstöðum héraðsdóms segir að brotin hafi fengið verulega á börnin.

Fréttastofa hefur áður fjallað um umræddan mann en þar sögðust foreldrar barna í Rimahverfi í Grafarvogi ráðalausir vegna karlmannsins. Hann hafi margoft verið tilkynntur til lögreglu og hafi áður hlotið dóm fyrir brot gegn blygðunarsemi barna. Heimsóknir lögreglu á heimili mannsins virðast litlu hafa skilað en ákærði hélt uppteknum hætti í kjölfarið.

Maðurinn býr á jarðhæð í blokk og snýr stofugluggi og svalarhurð íbúðar mannsins að nálægum leikvelli. Háttsemi mannsins er sambærileg í öllum ákæruliðum málsins en ákærði hefur þá staðið léttklæddur, nakinn eða íklæddur bol, ber að neðan og fróað sér.  

Lögreglumenn gripu manninn meðal annars í eitt skipti þar sem ákærði var að fitla við lim sinn við stofuglugga í íbúð sinni.  Maðurinn hljóp inn í íbúð með buxurnar á hælunum þegar hann sá lögreglumennina nálgast húsið, en tók á móti þeim fullklæddur. Að sögn lögreglumannsins hefði hver sem er getað séð hann og kvaðst ákærði þá vera haldinn sýniþörf. 

Leikvöllurinn kallaður „perraróló“

Í dóminum segir að börnin hafi átt erfitt uppdráttar í kjölfar háttseminnar. Þá treysti mörg börn sér ekki til að ganga framhjá leikvellinum og önnur hafi glímt við kvíða og spennu í kjölfar brota mannsins. Mörg börn sem urðu fyrir barðinu á manninum segjast hafa orðið hrædd og foreldri drengs segir atvikið hafa tekið sakleysið frá syni hennar. 

Þá eru dæmi um að maðurinn hafi brotið gegn blygðunarsemi sömu drengja oftar en einu sinni með athæfinu. Leikvöllinn hafa börn í hverfinu kallað „perraróló“ og að sögn foreldra hafa reglulega farið sambærilegar sögur af manninn í gegnum tíðina. Þá hafi það verið alþekkt að börn hafi forðast umræddan leikvöll, eða göngustíg leikvallarins, vegna mannsins.

Maðurinn ekki talinn ósakhæfur

Ákærði gekkst undir geðrannsókn við meðferð málsins en ekki var talið að hann væri ósakhæfur. Matsmaður mældi þó með því að manninum yrði gert að sæta eftirliti á réttargeðdeild Landspítalans en héraðsdómari féllst ekki á það.

Foreldrar drengjanna fóru fram á milljón hver í skaðabætur frá manninum. Héraðsdómari taldi þó aðeins efni til að manninum bæri að greiða börnunum 250.000 krónur hverju í skaðabætur.

Með vísan til ítrekunar og alvarleika brotanna var ákærða því gert að sæta fangelsi í tólf mánuði. Þá er honum gert að greiða verjanda sínum rúmar tvær milljónir, þóknun réttargæslumanna upp á rúma tvær og hálfa milljón, auk 480.000 króna í annan sakarkostnað.