Körfubolti

Grindvíkingar hafa ekki unnið heimasigur á KR í næstum því fjögur ár

Óskar Ófeigur Jónsson skrifar
Björgvin Hafþór Ríkharðsson og félagar í Grindavík ætla sér örugglega langþráðan heimasigur á KR í kvöld.
Björgvin Hafþór Ríkharðsson og félagar í Grindavík ætla sér örugglega langþráðan heimasigur á KR í kvöld. Vísir/Bára Dröfn

Grindvíkingar hafa fagnað mun oftar sigri í DHL-höll þeirra KR-inga á síðustu árum en þegar KR-ingar hafa heimsótt þá til Grindavíkur. Grindavíkurliðið getur bætt úr því í kvöld.

Fyrsti leikur þriðju umferðar Subway-deildar karla og fyrri sjónvarpsleikur dagsins er leikur Grindavíkur og KR í HS Orku-höllinni í Grindavík í kvöld.

Bæði liðin töpuðu í síðustu umferð og eru tvö af sex liðum deildarinnar með einn sigur og eitt tap í fyrstu tveimur umferðunum.

KR-ingar hafa unnið þrjá síðustu deildarleiki sína í Grindavík og hafa enn fremur farið burtu með bæði stigin í sjö af síðustu átta heimsóknum sínum til Grindavíkur.

Síðasti heimasigur Grindvíkinga á KR í úrvalsdeildinni var tíu stiga sigur, 94-84, 10. nóvember 2017. Jóhann Þór Ólafsson var þá þjálfari Grindavíkurliðsins og þeir Rashad Whack (28 stig, 6 stoðsendingar), Ólafur Ólafsson (20 stig), Sigurður Gunnar Þorsteinsson (14 stig, 14 fráköst) og Dagur Kár Jónsson (12 stig, 6 stoðsendingar) fóru fyrir liðinu. Aðeins Ólafur er enn að spila með Grindvíkingum.

Á þessum 47 mánuðum sem eru liðnir þá hafa Grindvíkingar reyndar unnuð KR-inga tvisvar en báðir sigurleikirnir hafa komið í Vesturbænum, tveggja stiga sigur í maí síðastliðnum og tíu stiga sigur í nóvember 2018.

Leikur Grindavíkur og KR hefst klukkan 18.15 og verður sýndur beint á Stöð 2 Sport. Strax á eftir verður bein útsending frá leik ÍR og Keflavíkur og strax eftir þann leik munu Subway-Tilþrifin gera upp alla leiki kvöldsins.

  • Síðustu átta deildarleikir Grindavíkur og KR í Röstinni í Grindavík:
  • 8. febrúar 2021: KR vann 12 stiga sigur (95-83)
  • 5. janúar 2020: KR vann 3 stiga sigur (94-91)
  • 3. mars 2019: KR vann 9 stiga sigur (103-94)
  • 10. nóvember 2017: Grindavík vann 10 stiga sigur (94-84)
  • 19. janúar 2917: KR vann 2 stiga sigur (80-78)
  • 2. nóvember 2015: KR vann 20 stiga sigur (93-73)
  • 5. febrúar 2015: KR vann 2 stiga sigur (73-71)
  • 10. október 2013: KR vann 20 stiga sigur (94-74)



Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.