Fótbolti

Messi sá fyrsti í áttatíu mörkin en ætlaði örugglega ekki að skora þarna

Óskar Ófeigur Jónsson skrifar
Lionel Messi fagnar markinu með liðsfélögum sínum. Markið braut ísinn og gerði argentínska liðinu allt auðveldara fyrir.
Lionel Messi fagnar markinu með liðsfélögum sínum. Markið braut ísinn og gerði argentínska liðinu allt auðveldara fyrir. AP/Natacha Pisarenko

Lionel Messi hélt áfram að skrifa söguna í nótt þegar hann kom argentínska landsliðinu á bragðið í 3-0 sigri á Úrúgvæ í undankeppni HM.

Messi varð þar með fyrsti Suður-Ameríkumaðurinn sem nær að skora áttatíu landsliðsmörk.

Messi hefur skorað mörkin sín 80 í 155 landsleikjum. Brasilíumaðurinn Pelé var mjög lengi sá markahæsti í Suður-Ameríku með 77 mörk í 92 leikjum en Neymar er nú kominn með 69 mörk í 114 leikjum. Messi hefur jafnframt skorað 26 mörkum fleira en næstmarkahæsti argentínski landsliðsmaðurinn sem er Gabriel Batistuta með 54 mörk.

Markið hans var samt frekar sérstakt en þá skoppaði fyrirgjöf hans fram hjá markverðinum og í markið. Afar slysalegt mark fyrir markvörð Úrúgvæja og um leið sögulegt mark fyrir Messi.

Nicolas Gonzalez gerði sig líklegan til að sparka tánni í boltann en missti af honum og það gerði Fernando Muslera líka í marki Úrúgvæ.

Messi ætlaði örugglega ekki að skora þarna sjálfur enda að gefa boltann fyrir en hann fagnaði markinu vel enda það mjög mikilvægt í baráttunni um sæti á HM í Katar 2022.

Messi hefur skorað mörg snilldarmörk á sínum ferli en þetta sögulega mark mun þó alltaf hafa á sér heppnisstimpil.

Rodrigo de Paul og Lautaro Martinez innsigluðu síðan sigur Argentínu og Messi var kátur í leikslok.

„Við spiluðu frábæran leik og allt gekk fullkomlega upp hjá okkur,“ sagði Lionel Messi eftir leikinn.

„Úrúgvæ situr aftarlega og bíður eftir þér og þeir eru alltaf hættulegir í skyndisóknunum. Um leið og við náðum inn fyrsta markinu þá fórum við að finna pláss og hin mörkin fylgdu í kjölfarið,“ sagði Messi.

Argentínska liðið hefur nú spilað 24 leiki í röð án þess að tapa og minnkuðu líka forskot Brasilíumanna í riðlinum þar sem að brasilíska liðið gerði á sama tíma markalaust jafntefli við Kólumbíu.




Fleiri fréttir

Sjá meira


×