Fótbolti

KSÍ vill að nefnd skoð­i við­brögð sam­bands­ins vegn­a kyn­ferð­is­of­beld­is­mál­a

Samúel Karl Ólason skrifar
Meðal annars vill KSÍ bæta afgreiðslu ofbeldismála og tryggja að þau fari í réttan farveg hjá samskiptaráðgjafa íþrótta- og æskulýðsstarfs eða lögreglu.
Meðal annars vill KSÍ bæta afgreiðslu ofbeldismála og tryggja að þau fari í réttan farveg hjá samskiptaráðgjafa íþrótta- og æskulýðsstarfs eða lögreglu. Vísir/Vilhelm

Stjórn Knattspyrnusambands Íslands hefur beðið Íþrótta- og Ólympíusamband Íslands um að stofnuð verði nefnd sem gera eigi úttekt á viðbrögðum og málsmeðferð KSÍ vegna kynferðisofbeldismála sem tengst hafa leikmönnum í landsliðum Íslands.

Mikið hefur gengið á í tengslum við karlalandsliðið og KSÍ að undanförnu.

KSÍ var gagnrýnt fyrir að hylma yfir með ofbeldisbrotum leikmanna landsliðsins og í kjölfarið sagði Guðni Bergsson af sér sem formaður sambandsins. Stjórnin fór síðan sömu leið og boðaði til aukaþings.

Guðni Bergsson, fyrrverandi formaður KSÍ.Vísir/Daníel Þór

Í tilkynningu frá KSÍ segir að umrædd nefnd eigi að fara yfir þá atburðarás sem leiddi til afsagnar formanns og stjórnar sambandsins og bregðast við ásökunum um þöggun. Nefndin á einnig að taka sérstaklega til athugunar hvort aðstæður innan KSÍ hamli þátttöku kvenna í starfi þess.

„Þetta er gert í tengslum við fullyrðingar sem fram hafa komið í opinberri umræðu um að KSÍ sé karllægt og fráhrindandi fyrir konur. Í því sambandi verður skoðað hvort skipulag KSÍ eða aðrir þættir í starfseminni séu hamlandi fyrir þátttöku kvenna í starfinu,“ segir í tilkynningunni.

Vilja bæta menningu og starfsanda

Í tilkynningunni segir einnig að KSÍ ítreki afsökunarbeiðni til þolenda og heiti því að vinna ótrautt að því að bæta menningu og starfsanda innan hreyfingarinnar.

„KSÍ vill laga starfshætti sína að kröfum tímans um viðbrögð við kynferðisofbeldi. Í þessu skyni hefur verið leitað til sérfræðinga og ráðgjafa til að aðstoða hreyfinguna við að vinna að úrbótum til framtíðar og bæta samskipti og upplýsingaflæði til samfélagsins. Stjórn mun leitast eftir að upplýsa um framgang mála fram að aukaþingi.“

Þá segir að sambandið fordæmi ofbeldi af öllu tagi og verið sé að bæta afgreiðslu ofbeldismála og tryggja að þau fari í réttan farveg hjá samskiptaráðgjafa íþrótta- og æskulýðsstarfs eða lögreglu.

Mikilvægt sé að skapa aðstæður til að gera raunverulegar úrbætur í takti við þá ráðgjöf sem KSÍ hafi fengið og að upplýst sé jafnóðum um þau skref sem stigin eru.

Í tilkynningunni eru nokkur atriði nefnd:

Tveir faghópar hafa þegar tekið til starfa hjá ÍSÍ og KSÍ sem hafa það hlutverk að skoða ferla, vinnubrögð og heimildir til aðgerða hjá samböndunum. Hægt verður að ráðast í breytingar á grundvelli þeirra niðurstaðna.

• KSÍ ætlar að bæta upplýsingagjöf innan hreyfingarinnar og til almennings og fjölmiðla. Fráfarandi stjórn og starfsmenn hafa óskað eftir ráðgjöf frá samskiptafélaginu Aton.JL fram að aukaþingi.

• Fundargerðir frá fundum sem leiddu til afsagnar formanns og síðar stjórnar eru nú aðgengilegar á vefsvæði KSÍ. Töf varð á birtingu fundargerða vegna óvenjulegra kringumstæðna, þar sem formaður hafði látið af störfum og framkvæmdastjóri var í tímabundnu leyfi.

• KSÍ mun veita nefnd ÍSÍ öll gögn sem óskað er eftir.

• Framboðsfrestur vegna stjórnarkjörs Knattspyrnusambandsins rennur út 25. september.

• Landsliðshópur A landsliðs karla fyrir októberverkefnin verður tilkynntur 30. september.

• KSÍ heldur aukaþing sitt 2. október og hefur Klara Bjartmarz, framkvæmdastjóri, snúið til baka úr leyfi til að undirbúa það.


Tengdar fréttir

„Hetjur síðustu ára urðu allt í einu ægilegar manneskjur“

Arnar Þór Viðarsson, þjálfari íslenska karlalandsliðsins í fótbolta, ræddi ástandið í íslenskum fótbolta í sjónvarpsþættinum Extra Time í Belgíu í gær. Þar sagði hann meðal annars að hetjur síðustu ára hafi skyndilega orðið að hræðilegum manneskjum.




Fleiri fréttir

Sjá meira


×