Sprenging á ís­lenska hluta­bréfa­markaðnum þroska­merki

Undanfarið ár hefur einkennst öðrum árum fremur af fréttum af meiri háttar hlutafjárútboðum gamalla og nýrra íslenskra félaga. Íslandsbankaútboðinu fylgdust allir landsmenn með og mikið fé safnaðist sömuleiðis í hlutafjárútboði Icelandair, Play, Síldarvinnslunnar og tölvuleikjafyrirtækisins Solid Clouds. 

Allt þetta er hluti af þróun sem kristallast í nýrri hagsjá Landsbankans, þar sem fram kemur að Ísland slær í raun heimsmetið í ár í samanlagðri verðhækkun á hlutabréfamarkaði.

Forysta Íslands er afgerandi. Tólf mánaða ávöxtun á hlutabréfamarkaði á Íslandi nemur 65,4% en næst á eftir kemur Svíþjóð með 41,7% vöxt. Danmörk og Noregur hafa notið 30-35% vaxtar og Bandaríkin eru á svipuðum slóðum, með 29,2%.

Einstök fyrirtæki hafa enda átt sögulega góð ár. Eimskipafélagið hefur rúmlega þrefaldast í virði frá því um miðjan september í fyrra, Kvika og Arion banki hafa hækkað um rúm 120% í virði, fasteignafélögin Reginn, Reitir og Eik hafa hækkað á bilinu 58-75% og Icelandair Group hefur hækkað um 16,4% í miðjum faraldri. Við þetta er síðan að bæta að Íslandsbanki hefur hækkað um 27% frá útboðinu í júní.

„Þetta er í raun þroskamerki. Íslenskur hlutabréfamarkaður hefur verið frekar óvirkur og grunnur, og aðallega bara verið lífeyrissjóðir og stofnanafjárfestar. Það sem er að gerast núna er að almenningur er að koma meira inn á markaðinn en áður,“ sagði Snorri Jakobsson hagfræðingur í kvöldfréttum Stöðvar 2.

Áður hafi almenningur frekar fjárfest í fasteignum, eins og Airbnb-íbúðum, en að hann snúi sér nú að hlutabréfamarkaðnum hafi mjög jákvæð áhrif á atvinnulífið. 

Skýringarnar á mikilli hækkun nú sé að vissu leyti að finna í óhóflega mikilli svartsýni framan af vegna faraldursins, en ekki að öllu leyti. Raunveruleg hækkun hafi átt sér stað eftir að væntingarnar réttu sig af. Að fjárfesta í hlutabréfum fylgi þó ætíð gríðarleg áhætta, enda aldrei hægt að vita hvernig fer.

„Það er rétt að árétta að markaðurinn hækkar ekki alltaf endalaust. Hann er búinn að hækka mjög mikið síðastliðið ár. Þetta voru mjög góð kauptækifæri og íslenski hlutabréfamarkaðurinn mjög ódýr fyrir ári, tala nú ekki um fyrir þremur árum síðan.“

Án þess að þú gefir fjármálaráðgjöf, á fólk að fara að fjárfesta? „Ég vil ekkert tjá mig um það, en ég myndi skoða málið mjög vel og einstök fyrirtæki,“ segir Snorri.