Innlent

Keflavíkurflugvöllur skilgreindur sem framvarðarstöð B-2 til sprengjuárása

Kristján Már Unnarsson skrifar
Um tvöhundruð liðsmenn bandaríska flughersins fylgja flugsveitinni til Íslands. Myndin var tekin þann 7. september, fyrir fimm dögum.
Um tvöhundruð liðsmenn bandaríska flughersins fylgja flugsveitinni til Íslands. Myndin var tekin þann 7. september, fyrir fimm dögum. U.S. Air Force/Victoria Hommel

Tvær af þremur B-2 Spirit sprengjuþotum bandaríska flughersins, sem staðsettar eru á Keflavíkurflugvelli um þessar mundir, æfðu með norska flughernum yfir Norðursjó í vikunni. Samkvæmt frétt norska hersins fóru æfingarnar fram á mánudag og miðvikudag með þátttöku F-35 orustuþotna Norðmanna sem komu frá Evenes-flugvellinum í Norður Noregi.

Í fréttum Stöðvar 2 fyrir þremur vikum voru sýndar myndir af komu flugsveitarinnar til Íslands. B-2 sprengjuþoturnar eru taldar einhver skæðustu árásarvopn mannkyns en þeim fylgja um tvöhundruð liðsmenn hersins.

Þrjár B-2 Spirit sprengjuþotur hafa sinnt verkefnum frá Keflavíkurflugvelli undanfarnar þrjár vikur.U.S. Air National Guard/John E. Hillier

Í frétt norska flughersins sem og þess bandaríska kemur fram að æfingarnar í síðustu viku hafi verið flóknar. Notkun vopnabúnaðar og eyðing loftvarna hafi verið æfð, fylgdaraðferðir verið prófaðar og verkferlar samræmdir.

„Þessi verkefni sýna fram á gildi áframhaldandi viðveru okkar og tengsla,“ segir hershöfðinginn Jeff Harrigian, yfirmaður bandaríska flughersins í Evrópu, í yfirlýsingu.

B-2 er stundum líkt við leðurblöku vegna óvenjulegrar lögunar hennar, sem gerir hana torséða á ratsjám.U.S. Air National Guard/John E. Hillier.

„Það sem flugmenn okkar ná fram í þessum verkefnum er mikilvægt fyrir bandalag okkar og til að viðhalda hæfni okkar þegar við höldum inn í framtíðina."

Verkefni Bomber Task Force sýni skuldbindingu Bandaríkjanna til sameiginlegra varna NATO og stuðli að stöðugleika í Evrópu. Þessi verkefni sýni að bandarískar hersveitir séu reiðubúnar til að starfa með farsælum hætti í krefjandi öryggisumhverfi á óvissutímum.

Hermenn koma æfingasprengju af gerðinni BDU-50 fyrir í B-2 sprengjuþotu. Þetta er reyksprengja ætluð til æfinga.U.S. Air Force/Victoria Hommel

Yfirmaður Whiteman-flugherstöðvarinnar í Missouri, þaðan sem B-2 sprengjuþoturnar koma, lýsir einnig ánægju sinni í yfirlýsingu.

„Tækifærið til að þjálfa og sinna verkefnum með bandamönnum okkar og samstarfsaðilum er ómetanlegt,“ segir ofurstinn Matthew Howard.

„Þessi verkefni gera flugmönnum okkar kleift að auka viðbúnað og bregðast við öllum áskorunum um heim allan. Þó að B-2 hafi æft eldsneytistöku i á Keflavíkurflugvelli árið 2019 þá er þetta í fyrsta skipti sem B-2 er gerð út frá Íslandi og fyrir Whiteman flugherstöðina er frábært að taka þátt í þessu sögulega verkefni,“ segir ofurstinn, sem jafnframt er leiðangursstjóri.

„Við erum með mjög öflugt teymi og erum reiðubúnir til að gera út frá Keflavíkurflugvelli og framkvæma verkefni okkar til stuðnings öllum markmiðum evrópsku herstjórnarinnar,“ segir Howard og minnir á að B-2 haldi enn stöðu sinni sem fremsta torséða sprengjuþota heims.

B-2 Spirit-sprengjuþoturnar eru dýrustu flugvélar sem smíðaðar hafa verið. Aðeins tuttugu eru í notkun og eru þrjár þeirra núna gerðar út frá Keflavík.U.S. Air National Guard/John E. Hillier

Í fréttatilkynningu bandaríska flughersins fyrir tveimur árum var Keflavíkurherstöðinni lýst sem útstöð fyrir B-2 sprengjuþotuna. Þessi skilgreining er núna ítrekuð og raunar kveðið skýrar að orði. Með því að gera Keflavík að nýrri framvarðarstöð til að hefja sprengjuárásir sé stutt við stefnu varnarmálaráðuneytisins um að viðhalda valdajafnvægi á svæðinu.

Koma sprengjuflugvéla stuðli að árvekni á öllum sviðum, þar sem norðurheimskautið sé stefnumarkandi svæði sem hafi vaxandi geopólitískt og alþjóðlegt mikilvægi. Að vinna þvert á sameiginlegar hersveitir sé þýðingarmikið vegna mikilla vegalengda og margra áskorana á svæðinu.

Hér má sjá myndskeið frá komu B-2 sprengjuflugvélanna til Keflavíkur fyrir þremur vikum:

Hér má sjá myndskeið frá komu fyrstu B-2 til Íslands fyrir tveimur árum:


Tengdar fréttir

Skæðustu sprengjuþotur heims við æfingar á Íslandi næstu daga

Þrjár bandarískar sprengjuþotur af gerðinni Northrop B-2 Spirit lentu í Keflavík í gærkvöldi og verða þær við æfingar hér við land næstu daga. Þoturnar eru þær dýrustu í flugsögunni og taldar einhver skæðustu árásarvopn sem mannkyn hefur smíðað.

Öflugustu sprengjuþotur Bandaríkjahers æfðu undan ströndum Íslands í fyrrinótt

Tvær B-2 Spirit-herþotur og tvær B-1B Lancers-herþotur voru látnar hittast undan ströndum Íslands í fyrrinótt í æfingaflugi, sem Bandaríkjaher segir að hafi verið til að undirstrika þá miklu áherslu sem flugherinn leggi á norðurslóðir. Önnur tegundin er hljóðfrá, hin torséð og getur borið kjarnorkuvopn, og eru þær taldar skæðustu sprengjuþotur NATO-herja.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.