Skaust óvænt heim og kom nágranna sínum til bjargar

Íbúi á efri hæð hússins hafði þurft að skreppa heim til sín úr vinnu og við blasti mikill reykur sem lagði út um glugga í kjallaraíbúð hússins.

Samkvæmt upplýsingum fréttastofu hringdi nágranninn strax á Neyðarlínuna og byrjaði svo að banka á dyrnar í kjallaranum. Þá rumskaði þar kona sem kom til dyra.

Hún var flutt á sjúkrahús með reykeitrun en er ekki talin í lífshættu.

Eldurinn virðist hafa komið upp í eldhúsi íbúðarinnar en þó ekki dæmigerður eldavélabruni eða slíkt samkvæmt upplýsingum frá slökkviliði.

Íbúðin er illa farin en reykræsting stendur yfir í Þingholtunum.