Lands­liðs­þjálfarinn enn já­kvæður þrátt fyrir að það sé „stormur á sjó“

„Við vitum að við erum að fara spila á heimavelli gegn einu besta landsliði heims. Við vitum að þeir verða meira með boltann og við þurfum að verjast. Við þurfum líka að þora að halda í boltann þegar við erum með hann, það er ómögulegt að hlaupa á eftir boltanum í 90 plús mínútur.“

„Við viljum fá að sjá okkar lið, sem er fljótt að færa sig milli svæða og fljótt að sækja. Svo er þetta spurning um hugarfar. Að vera tilbúnir að taka og hlaupa alla þessa metra vegna þess að þetta er erfitt en það er þannig í íþróttum, það þarf að leggja á sig til að ná árangri.“

Varðandi uppbyggingu landsliðsins

„Við erum og gerum okkur grein fyrir því að staðan núna er allt önnur en þegar hún var þegar við tókum við liðinu. Þessi uppbyggingarfasi og þróun á liðinu er að gerast aðeins fyrr en við höfðum ætlað og planað.“

„Það breytir því ekki að við erum stoltir af hópnum sem við erum með í höndunum og við eigum mjög gott knattspyrnulið þó það séu ungir drengir í því. Þýðir ekki að við eigum að sætta okkur við það að tapa öllum leikjum. Við eigum að vilja vinna leiki og það er líka þróun á liði og leikmönnum að þeir geri sér grein fyrir að þeir geti unnið knattspyrnuleiki og við viljum vinna knattspyrnuleiki. Við höldum þessari þróun að sjálfsögðu áfram en viljum líka vinna.“

Varðandi stöðuna á markvörðum liðsins

„Hún er þannig að Hannes (Þór Halldórsson) er búinn að vera frábær fyrir Ísland í mörg mörg ár. Ég hef sagt það oft áður undanfarnar vikur að ferillinn hans Hannesar er ótrúlegur. Ekki bara hversu góður hann er í marki núna og hefur verið og er núna heldur hvað hann hefur þurft að hafa mikið fyrir því.

„Hannes poppaði ekkert upp á yfirborðið sem fullþroskaður markmaður. Hann þurfti að leggja mikið á sig og er skólabókardæmi um þennan íslenska draum. Að koma úr íslensku deildinni og ná öllum þessum árangri.“

„Staðan nú er sú að Hannes verður ekki í markinu næstu fimm árin og við þurfum að kíkja hver er næsti ´fyrsti markmaður´ Íslands og Rúnar Alex er búinn að spila tvö leiki og gerði það að mörgu leyti mjög vel. Veit alveg sjálfur að hann gerði ákveðin mistök en þú verður að fá að gera mistök til að læra.“

„Það er ómögulegt að henda einhverjum inn í liðið og ætlast til að gera enginn geri mistök. Þá er mjög auðvelt að þróa knattspyrnulið. Þá getum við öll gert þetta. Það er bara þannig að við þurfum að taka þessi skref og vera tilbúin að taka þessu höggi sem stundum kemur á leikmenn. Ég gekk í gegnum það sjálfur sem leikmaður líka þannig það er bara hundleiðinlegt og erfitt en við gerum það besta úr því og þau skref á þeim forsendum og þeim tímum sem við teljum að það sé best.“

Að vera með hóp í þessari stöðu í undankeppni heimsmeistaramóts

„Þetta er mjög erfitt og það að mörgu leyti. Þetta er erfitt því við erum í þessari þróun. Þetta er erfitt því við erum í þriggja leikja glugga. Þessir þriggja leikja gluggar eru mjög flóknir að því leytinu til að það er leikið þétt, lítið hægt að æfa.“

„Þetta eru erfitt út af umræðunni, við erum ekkert að fela okkur á bakvið það, við vitum að þetta er erfitt. Við vitum líka að sem íþróttamenn þarftu að reyna stjórna því sem þú getur stjórnað. Við höfum reynt að gera það alla þessa daga sem við erum saman. Það er leikur á morgun og það sem ég er ánægðastur með er að ég sé enn orku í liðinu, í leikmönnum, þrátt fyrir allt sem á undan er gengið. Ég finn það hjá sjálfum mér að það er enn orka, gleði og jákvæðni við að takast á við þetta. Ef það væri ekki þá væri þetta hundleiðinlegt. Mér finnst þetta enn rosalega skemmtilegt.“

„Það er stormur, stormur á sjó. Eitthvað sem við þurfum að takast á, sagði í gær eða hinn að við þurfum öll að takast á við þetta saman. Þurfum að ræða hlutina, hætta að öskra á hvort annað og reyna finna lausnir á þeim vandamálum sem eru og gera það saman,“ sagði Arnar Þór Viðarsson að endingu.

Leikur Íslands og Þýskalands hefst klukkan 18.45 og verður í beinni textalýsingu hér á Vísi. Að leik loknum verður einnig umfjöllun um leikinn, einkunnir og viðtöl.