Handbolti

Óvænt samkeppni og bekkjarseta en gæti orðið mikilvægasta tímabilið á ferlinum

Ingvi Þór Sæmundsson skrifar
Torbjørn Bergerud og Viktor Gísli Hallgrímsson mynda markvarðapar GOG.
Torbjørn Bergerud og Viktor Gísli Hallgrímsson mynda markvarðapar GOG. getty/Martin Rose/vísir/andri marinó

Staða Viktors Gísla Hallgrímssonar hjá danska úrvalsdeildarliðinu GOG breyttist talsvert í sumar þegar það fékk Torbjørn Bergerud, markvörð norska landsliðsins, til sín. Viktor segir að það hafi tekið tíma að venjast breyttu hlutverki hjá GOG en vonast til að þetta tímabil gæti reynst mikilvægt í framtíðinni.

Bergerud kom til GOG frá Flensburg þar sem hann vann meðal annars þýska meistaratitilinn. Bergerud, sem er 27 ára, er í hópi bestu markvarða heims og hefur átt stóran þátt í góðum árangri norska landsliðsins á undanförnum árum.

Með komu Norðmannsins færðist Viktor aftar í goggunarröðina hjá GOG.  

„Það hefur verið mjög áhugavert að æfa með honum og bera sig saman við hann. Þetta hefur verið mjög skemmtilegur mánuður en aðeins öðruvísi að sitja á bekknum. Ég hef ekki gert það oft á mínum ferli og alltaf fengið að spila mikið,“ sagði Viktor við Vísi. 

Landsliðsmarkvörðinn unga grunar þó að þetta tímabil geti nýst vel í framtíðinni.

„Þetta verður öðruvísi tímabil og kannski erfitt andlega en ég held að ég geti lært ógeðslega mikið á því að vera annar markvörður. Þetta ár gæti orðið það þegar ég horfi til baka og sagt að þetta hafi verið mikilvægasta tímabilið á ferlinum,“ sagði Viktor.

Í gær var greint frá því að Viktor hefði samið við Nantes í Frakklandi. Hann fer þangað eftir tímabilið. Viktor, sem er 21 árs, hefur leikið með GOG síðan 2019.




Fleiri fréttir

Sjá meira


×