Atvinnulíf

Vinnustaðir fyrir og eftir Covid

Rakel Sveinsdóttir skrifar
Vinnustaðir og störf munu gjörbreytast í kjölfar Covid. Hvernig verður vinnustaðurinn þinn?
Vinnustaðir og störf munu gjörbreytast í kjölfar Covid. Hvernig verður vinnustaðurinn þinn? Vísir/Getty

Um allan heim eru vinnustaðir að móta sér hugmyndir og stefnur um hvernig best er að haga til framtíðinni þar sem fjarvinna er orðin hluti af veruleika atvinnulífsins. BBC Worklife leitaði til nokkurra sérfræðinga eftir áliti á því hvaða breytingar við munum helst sjá í kjölfar Covid.

Því þar sem fjarvinna er orðin að veruleika svo víða, er gert ráð fyrir að margir vinnustaðir muni breytast í það að verða fyrst og fremst staður fyrir starfsfólk að mæta á, ef það á þangað erindi.

Til dæmis að mæta á fund eða til að taka þátt í teymisvinnu.

Eða hreinlega til þess að hafa gaman með samstarfsfólki.

Hér eru nokkrir athyglisverðir punktar:

Vinnustaðir munu hverfa frá því að huga að góðum vinnustöðvum fyrir hvern og einn.

Þess í stað verður aukin áhersla á að skapa þægilegt andrúmsloft og spennandi félagsrými.

Að þessu sögðu er þó jafnframt gert ráð fyrir því að allt skipulag sé sveigjanlegt. Því það sem Covid hefur kennt atvinnulífinu er að allt getur breyst með mjög stuttum fyrirvara.

Skipulag þarf því að vera í sífelldri þróun.

Þá munu vinnustaðir horfa á mun fleiri þætti en áður þegar kemur að heilsu starfsfólks. 

Hér mun tæknin meðal annars láta til sín taka. 

Takkar í lyftum, hurðahúnar, slökkvarar og fleiri snertifletir munu heyra sögunni til. Þannig mun Covid hraða allri tæknivæðingu sem byggir á skynjurum frekar en snertiflötum.

Sóttvarnir munu áfram birtast í ýmsum myndum á vinnustöðum. Sem dæmi má nefna að í sameiginlegum rýmum starfsfólks er talið að vinnustaðir muni gera ráð fyrir því að fólk geti haldið fjarlægðarmörkum á milli sín ef það kýs svo. Til dæmis á fundum eða í hópavinnu.

Enn ein breytingin er líka sú að vinnustaðir munu horfa mun meira til andlegrar heilsu fólks í samanburði við fyrir Covid.

Einangrun eða útundanótti eru til dæmis fylgifiskar fjarvinnu. Til að mæta því og bæta upp þann missi sem fólk upplifir þegar það hættir að hitta samstarfsfólk sitt daglega, verður fókusinum beint að andlegri líðan og heilsu almennt. Þetta er nokkur breyting frá því sem verið hefur þar sem áhersla vinnustaða hefur meira beinst að líkamlegu hreysti.

Þá er því spáð að tæknirisarnir muni leggja meiri áherslu á að þróa nýjungar til að tryggja fólki sem bestu upplifunina og líðanina með tækninni. 

Sem dæmi má nefna umhverfi fjarfunda sem sérfræðingar telja að risar eins og Microsoft og Google muni þróa þannig að þeir verði fyrst og fremst jákvæð upplifun fyrir þátttakendur, en ekki bara leið til að hittast og funda.

Grein BBC má lesa hér.

Í nýlegri skýrslu McKinsey segir einnig að Covid muni hraða breytingum fjórðu iðnbyltingarinnar enn frekar. 

Þegar hafi verið fyrirséð að milljónir starfa myndu breytast vegna sjálfvirknivæðingar. 

Að mati sérfræðinga McKinsey eru líklegar afleiðingar heimsfaraldurs hins vegar þær að um fjórðungur starfsfólks þarf að gera ráð fyrir því að störf þeirra muni breytast verulega í kjölfar Covid.


Tengdar fréttir

Endalok skrifstofurýma

Dagar skrifstofurýma eru senn taldir og skipuleggja þarf miðborgir upp á nýtt. Þá þarf að endurútfæra öll vinnuréttindi þar sem fjarvinna er komin til að vera.

Færri skrifborð, breyttar áherslur og nýir samningar

Covid er að breyta vinnustöðum til framtíðar og ekki er ólíklegt að húsakostur margra muni breytast næstu misseri. Sums staðar er verið að meta með hvaða hætti framtíðarskipulag ætti að vera, á meðan aðrir vinnustaðir eru farnir að gera nýja samninga um skuldbindingar í fjarvinnu. Þeir samningar eru þá meðal annars gerðir til þess að hægt verði að taka ákvarðanir um húsakost. Varanlegum breytingum í kjölfar Covid fylgja nýjar áskoranir í stjórnun. 

„Við þurfum að vinna gegn útundanóttanum“

„Ég vinn meðal annars við að aðstoða og styðja fólk í að reyna að ná utan um þær óvelkomnu breytingar sem hafa orðið í Covid faraldrinum,“ segir Þórkatla Aðalsteinsdóttir sálfræðingur hjá Líf og sál og bendir á að vinnustaðir þurfi að huga vel að þeim áhrifum sem Covid er að hafa á fólk, því þeim áhrifum muni ekki ljúka með bólusetningum. 

Mælingar fjarvinnu í Covid: Afköst aukast en ekki vöðvabólga

„Eitt af því sem að við héldum að myndi gerast núna í nóvember, væri að vöðvabólga og bakverkir myndu aukast, þar sem fólk væri í meira mæli að vinna heima og sumir hugsanlega ekki við kjöraðstæður. En við erum hvorki að sjá aukningu á bakverkjum eða vöðvabólgu frá því í apríl,“ segir Tómas Bjarnason sviðsstjóri mannauðsrannsókna og ráðgjafar Gallup.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.