Landssamtökin Þorskahjálp fengu nýverið vilyrði fyrir styrk frá utanríkisráðuneytinu til þess að styðja við menntun og samfélagsþáttöku fatlaðra barna í Mangochi-héraði í Malaví. Markmið verkefnisins er að auka möguleika fatlaðra barna til náms og þátttöku í samfélaginu og vinna að vitundarvakningu um samning Sameinuðu þjóðanna um réttindi fatlaðs fólks, en stjórnvöld í Malaví gerðust aðili að samningnum árið 2009.

Þroskahjálp greindi frá því í frétt sinni að telja megi víst að áhrif heimsfaraldursins muni gera stöðu fatlaðs fólks enn erfiðari á næstu árum og að því sé brýnt að gæta að viðkvæmustu hópum í öllu uppbyggingarstarfi. „Þroskahjálp leggur í öllu starfi sínu mikla áherslu á heimsmarkmið Sameinuðu þjóðanna og við lítum svo á að mannréttindastarf einskorðast ekki við lönd og landsvæði. Barátta Landssamtakanna Þroskahjálpar fyrir mannréttindum fatlaðs fólks nær því til alls fatlaðs fólks, hvarvetna í heiminum,” segir Anna Lára Steindal verkefnastjóri hjá Þroskahjálp.

Unnið verður að því að gera þarfagreiningu og frumkönnun á umfangi málaflokksins í Mangochi, þ.e. hversu mörg fötluð börn búa í héraðinu, hversu mörg þeirra ganga í skóla, hvernig er þátttöku þeirra í almennu lífi barna háttað, hver eru viðhorf til fatlaðs fólks, þekking á samningi Sameinuðu þjóðanna um réttindi fatlaðs fólks.

Verkefnið mun koma til framkvæmdar í Mangochi-héraði í Malaví þar sem Ísland sinnir einnig tvíhliða þróunarsamvinnu í samstarfi við héraðsyfirvöld. Verkefnið er fyrst og fremst mannréttindaverkefni sem stefnir að því að tryggja mannréttindi fatlaðra barna í Mangochi. Þroskahjálp vinnur í samvinnu við FEDOMA, samtökum fatlaðs fólks í Malaví og verður hluti verkefnisins stuðningur við starfsemi þeirra á svæðinu.

Styrkurinn er hluti af samstarfi utanríkisráðuneytisins við íslensk félagasamtök í þróunarsamvinnu og mannúðaraðstoð. Opið er fyrir umsóknir til mannúðaraðstoðar allt árið svo lengi sem fjárheimildir leyfa. Allar nánari upplýsingar má finna hér.