Inter búið að samþykkja tæplega 100 milljón punda boð Chelsea í Lukaku

Lukaku er 28 ára gamall og hefur leikið í tvö ár í Mílanó eftir skipti sín þangað frá Manchester United 2019. Hann varð ítalskur meistari með liðinu á síðustu leiktíð.

Hann samdi við Chelsea 18 ára gamall árið 2011 en lék aðeins tíu leiki fyrir félagið eftir að hafa verið keyptur á 17 milljónir punda frá Anderlecht í heimalandi hans Belgíu. Honum gekk þó vel á láni hjá bæði West Bromwich Albion og Everton og var keyptur til Everton 2014 á 28 milljónir punda.

Eftir þrjú ár í Liverpool-borg borgaði Manchester United 75 milljónir punda fyrir þjónustu framherjans. Honum tókst ekki að skora eins mikið þar og hann hafði gert hjá Everton og eftir titlalaus tvö ár var hann seldur til Ítalíu.

Lukaku virðist nú vera að snúa aftur til Chelsea tíu árum eftir fyrri skipti sín til Lundúna og mun hann kosta töluvert meira. Breska ríkisútvarpið, BBC, greinir frá því að Inter hafi samþykkt tilboð upp á 115 milljónir evra, eða 97,5 milljónir punda, í Belgann.

Hann verður því næst dýrasti leikmaður sem enskt knattspyrnulið kaupir, 2,5 milljónum ódýrari en Jack Grealish sem fór á 100 milljónir punda til Manchester City í vikunni.