Fótbolti

Liverpool grætt 120 milljónir á sölum úr akademíunni

Valur Páll Eiríksson skrifar
Sölur á þeim ungu hjálpa til við að fjármagna styrkingu á aðalliðshópi félagsins.
Sölur á þeim ungu hjálpa til við að fjármagna styrkingu á aðalliðshópi félagsins. EPA-EFE/David Klein / POOL

Enska knattspyrnufélagið Liverpool seldi á dögunum velska landsliðsmanninn Harry Wilson til Fulham fyrir 12 milljónir punda. Wilson spilaði ekki mínútu fyrir félagið í ensku úrvalsdeildinni en er á meðal nokkurra sem hafa skapað mikinn hagnað félagsins af unglingastarfinu.

Aukin áhersla hefur verið á unglingastarf hjá Liverpool frá því að nýir eigendur tóku við því árið 2010. Borið hefur meira á ungum leikmönnum í aðalliðshópi félagsins, svo sem Trent Alexander-Arnold, Curtis Jones og Neco Williams, en ekki síður hefur Liverpool grætt á því að selja þá frá félaginu.

James Pearce, íþróttafréttamaður hjá The Athletic sem sérhæfir sig í málefnum Liverpool, bendir á að félagið hefur selt leikmenn úr akademíu sinni, sem ýmist eru uppaldir frá barnsaldri eða fengnir til liðsins á unglingsaldri, fyrir 120 milljónir punda á síðustu fimm árum.

Sú upphæð geti hækkað enn frekar ef Liverpool kýs að selja Nat Phillips, sem kom sterkur inn í liðið eftir meiðsli Joe Gomez og Virgil van Dijk í fyrra. Phillips var fenginn frítt til Liverpool árið 2016 eftir að hafa verið leystur undan samningi hjá Bolton Wanderers og er metinn á 15 milljónir punda.

Fyrr í sumar seldi Liverpool hinn unga Liam Millar til Basel fyrir 1,6 milljónir punda, eftir að hafa fengið hann frítt frá Fulham, og pólska markvörðinn Kamil Grabara til FC Kaupmannahafnar fyrir 3 milljónir punda, eftir að hafa keypt hann á 250 þúsund pund.

Liverpool fékk Rhian Brewster frá Chelsea þegar hann var 15 ára en seldi hann fyrir 23,5 milljónir punda til Sheffield United í fyrra. Sama sumar fór hollenski bakvörðurinn Ki-Jana Hoever til Wolves fyrir 13,5 milljónir, eftir að hafa fengist á 90 þúsund pund frá Ajax.

Sumarið 2019 var Rafael Camacho seldur til Sporting Lissabon fyrir 7 milljónir, 7,5 milljónir fengust frá Rangers fyrir Ryan Kent og Danny Ward fór á 12,5 milljónir punda til Leicester City. Samtals kostuðu þeir 100 þúsund pund, sem raunar allt fór í Ward þegar hann var keyptur frá Wrexham, þar sem Kent er uppalinn og Camacho fékkst frítt.

Einnig má nefna leikmenn á við Jordon Ibe, Andre Wisdom, Kevin Stewart, Brad Smith og Sergi Canos sem hafa verið seldir með töluverðum gróða síðustu ár.

Rekstrarkostnaður við akademíu félagsins er rúmar tíu milljónir punda á ári og virðist sá peningur vera að skila vel af sér. Þónokkrir spennandi leikmenn eru að koma upp hjá Liverpool þessa dagana, svo sem Harvey Elliott, hinn pólski Mateusz Musialowski, Frakkinn Billy Koumetio og hinn 16 ára gamli Kaide Gordon sem liðið borgaði Derby County eina milljón punda fyrir nýlega.

Áhugavert verður að sjá hvort þeir geri nóg til að komast í aðallið félagsins eða hvort þeir verði hluti af gróðavélinni sem akademían virðist orðin.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.