Keppnin „Besti götubiti Íslands“ var haldin í samstarfi við European Street Food Awards sem er stærsta götubitakeppni í heiminum í dag.
Keppnin er haldin víðs vegar um Evrópu og mun Ísland vera með fulltrúa í lokakeppninni.
Keppt var í þó nokkrum flokkum: Besti grænmetisrétturinn, besti smábitinn, götubiti fólksins, besta framsetningin og síðast en ekki síst „Besti götubitinn 2021“.
Staðurinn Chikin vann tvo titla: Besti grænmetisrétturinn og besti smábitinn.
Þá vann Just Wingin It - Vængjavagninn titilinn götubiti fólksins.
Það var svo enginn annar er Silli kokkur sem var valinn „Besti götubiti Íslands 2021“.
Í öðru sæti var matarvagninn Reykur BBQ og í þriðja sæti var Just Wingin It - Vængjavagninn.
Dómnefnd skipuðu þau Óli Óla, veitingamaður, Binni Löve, áhrifavaldur, Helgi Svavar, matgæðingur, Shruthi Basapa frá Grapevine og Stefanía Thors, húsmóðir.
Keppnin var haldin í fyrsta sinn árið 2019 og var það grænkeraveitingastaðurinn Jömm sem var fulltrúi Íslands í lokakeppninni sem þá fór fram í Malmö.
