Enski boltinn

Vieira mættur aftur í enska boltann

Anton Ingi Leifsson skrifar
Patrick Vieira er tekinn við Crystal Palace.
Patrick Vieira er tekinn við Crystal Palace. EPA-EFE/Sebastien Nogier

Patrick Vieira hefur verið ráðinn þjálfari Crystal Palace en hann hefur skrifað undir þriggja ára samning við Lundúnarliðið.

Palace hefur leitað af þjálfara í sumar eftir að ljóst var að Roy Hodgson myndi hætta sem knattspyrnustjóri eftir síðustu leiktíð.

Lucian Favre, fyrrum stjóri Dortmund, var líklegur til að taka við en hætti við á síðustu stundu. Einnig neitaði Nuno Espirito Santo starfinu.

Palace vildi þjálfara með reynslu úr ensku úrvalsdeildinni en lítið gekk að finna þann mann svo Vieira var næstur í röðinni.

Félagið hefur undirbúning fyrir næstu leiktíð á morgun og vildi stjórn félagsins vera búin að ráða stjóra er leikmenn mættu til æfinga.

Vieira stýrði síðast liði Nice í frönsku úrvalsdeildinni. Hann tók við liðinu sumarið 2018 og stýrði þeim þangað til í desember síðastliðnum er hann var látinn taka pokann sinn.

Vieira lék með Arsenal á árunum 1996 til 2005 við góðan orðstír. Einnig lék hann svo eina leiktíð með Man. City frá 2010 til 2011 og var síðar í starfsliði félagsins.




Fleiri fréttir

Sjá meira


×