Klókir kjúklingasalar auglýsa á besta stað í bólusetningu

Vésteinn Örn Pétursson skrifar 23. júní 2021 14:15

Vart er hægt að finna kjúklingaauglýsingunni betri stað en í Laugardalshöll þangað sem þúsundir manna leggja nú leið sína með reglubundnum hætti. Vísir/Vésteinn

Auglýsing fyrir kjúklingastað er nú meðal þess sem birtist á stjórum skjá inni í stóra sal Laugardalshallar og tekur á móti höfuðborgarbúum sem hyggjast láta bólusetja sig við kórónuveirunni. Framkvæmdastjóri hallarinnar segir kjúklingastaðinn hafa átt hugmyndina að birtingu auglýsingarinnar, sem vel hafi verið tekið í.

Það vakti athygli blaðamanns, þegar hann lagði leið sína í höllina í dag til að fá seinni skammt af bóluefni Pfizer, að inni í stóra bólusetningarsalnum var auglýsing frá kjúklingastaðnum BK Kjúklingi uppi á skjánum. Þegar fyrri bólusetningin fór fram hafði nefnilega verið í gangi beint streymi Ríkisútvarpsins frá eldstöðvunum í Geldingadölum.

Auglýsing kjúklingastaðarins var þó ekki það eina sem prýddi skjáinn, heldur einnig auglýsing frá góðgerðarsamtökunum Unicef, auk merkis sjálfrar Laugardalshallarinnar. Hér hlýtur að vera um að ræða nokkuð óvenjulega en jafnframt áhugaverða leið til að markaðssetja sig, þar sem fjöldi fólks hefur lagt leið sína í Laugardalshöll til að fá bólusetningu, og margir tvisvar.

Matsölustaðurinn sá tækifæri

Birgir Bárðarson, framkvæmdastjóri Laugardalshallar, segir í samtali við Vísi að auglýsingin hafi birst fyrst í dag. BK Kjúklingur hafi átt frumkvæðið og haft samband við rekstraraðila hússins með það í huga að fá auglýsinguna birta. Hugmynd sem vel var tekið í, enda gott að hafa eitthvað á skjánum til þess að róa taugar þeirra allra sprautuhræddustu.

„Það var þarna auglýsing frá Unicef. Svo kom einhver frá BK og sá þarna tækifæri og við sögðum, af hverju ekki bara að leyfa þeim að prófa? Ef við fáum einhver neikvæð viðbrögð við þessu, þá bara slökkvum við á þessu,“ segir Birgir.

Skjárinn gnæfir yfir bólusettum skaranum í höllinni.Vísir/Vésteinn

Hann segir ekki miklar tekjur af auglýsingasölunni og þær fari eingöngu upp í rekstur á skjánum, þar sem ýmiskonar sjónvarpsefni hefur verið sýnt meðan fólk flæðir inn og út úr salnum undir vel skipulagðri stjórn starfsmanna heilsugæslunnar.

„Við erum bara að reyna að fá fólk til að hætta að hugsa um nálina sem er að nálgast sig,“ segir Birgir.

Í tilfelli þess sem hér skrifar, og velti vöngum yfir auglýsingunni og tók vart eftir sprautunni, gekk það fullkomlega upp.

Laugardalshöll sniðin að verkefninu

Birgir segir samstarf Laugardalshallarinnar við Heilsugæslu höfuðborgarsvæðisins ganga óaðfinnanlega.

„Við erum mjög ánægð hvað það gengur vel í bólusetningum. Við vitum að eftir helgi verða stærstu dagarnir sem hafa komið. Við erum bara tilbúin að taka á móti öllum þessum fjölda með heilsugæslunni.“

Hann segir húsnæði Laugardalshallar hafa hentað vel í fjöldabólusetningarnar sem þar hafa farið fram síðustu vikur og mánuði, enda viti fólk almennt hvar höllin er og nóg sé af bílastæðum í næsta nágrenni.

Bólusetningar Auglýsinga- og markaðsmál Faraldur kórónuveiru (COVID-19)

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið

Fleiri fréttir