Körfubolti

Kvennalið Snæfells dregur lið sitt úr Domino's deildinni

Óskar Ófeigur Jónsson skrifar
Kvennalið Snæfells hefur spilað í efstu deild frá árinu 2008.
Kvennalið Snæfells hefur spilað í efstu deild frá árinu 2008. Vísir/Vilhelm

Snæfell verður ekki með lið í Domino's deild kvenna í körfubolta á næstu leiktíð en stjórn körfuknattleiksdeildar Snæfells hefur ákveðið að gefa eftir sæti sitt í deildinni.

Stjórn körfuknattleiksdeildar Snæfells sendi frá sér tilkynningu í dag þar sem kemur fram að hún hafi ákveðið að skrá kvennalið sitt í fyrstu deild fyrir komandi leiktíð.

Það er ekki langt síðan að Snæfellskonur voru í fremstu röð í kvennakörfunni en það hefur fjarað mikið undan liðinu á síðustu árum.

Snæfell varð Íslandsmeistari þrjú ár í röð frá 2014 til 2016 og spilaði einnig til úrslita um Íslandsmeistaratitilinn árið 2017.

Liðið bjargaði sér frá falli á lokasprettinum í vetur en KR-konur féllu úr Domino's deildinni.

„Ástæða er rekstur sem og að máttarstólpar liðsins frá síðustu leiktíð leita á önnur mið og um leið erfitt að manna lið fyrir Dominos deildina,“ segir í fréttatilkynningunni.

Njarðvík og Grindavík eru að spila um eitt laus sæti í Domino's deildinni en svo gæti farið að þau fái bæði sæti í Domino's deildinni á næsta tímabili.

Snæfell er því enn eitt félagið sem fer þessa leið í kvennakörfunni en Grindavík,  KR og Stjarnan hafa gert hið sama á síðustu árum. Stjarnan lagði reyndar niður meistaraflokk kvenna hjá sér en hefur endurvakið hann aftur.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.