Ekki lengur krafa um neikvætt Covid-próf fyrir ferðamenn frá Norðurlöndum

Atli Ísleifsson skrifar 28. maí 2021 13:51

Sænski innanríkisráðherrann kynnti breytingarnar á blaðamannafundi í dag. Myndin er úr safni. Getty

Sænsk stjórnvöld hafa ákveðið að aflétta kröfu um að ferðamenn sem koma frá Norðurlöndum sýni fram á neikvætt PCR-próf við komuna til Svíþjóðar. Nýjar reglur taka gildi síðasta dag maímánaðar og á þá við ferðamenn frá Danmörku, Finnlandi, Noregi og Íslandi.

Þetta kom fram í máli innanríkisráðherrans Mikael Damberg í dag þar sem hann kynnti breytingar á reglum á landamærum.

Ekki eru gerðar neinar breytingum sem eiga við um ferðamenn frá Svíþjóð og þurfa Svíar enn að sýna fram á neikvætt próf og mögulega sæta sóttkví þegar þeir ferðast er til annarra Norðurlanda.

„Hin norrænu löndin eru ekki reiðubúin að gera það sem Svíþjóð gerir. Við vorum síðust til að koma á takmörkunum og nú verðum við fyrst til að aflétta þeim,“ sagði Damberg.

Takmarkanir fyrir ferðamenn sem koma til Svíþjóðar frá öðrum aðildarríkjum Evrópusambandsins og evrópska efnahagssvæðisins verða þó áfram þær sömu til 30. júní hið minnsta og þurfa ferðamenn frá þeim ríkjum að sýna fram á neikvætt próf við komuna til Svíþjóðar.

Faraldur kórónuveiru (COVID-19) Svíþjóð

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.