Handbolti

Alexander á leið til Guðmundar

Ingvi Þór Sæmundsson skrifar
Alexander Petersson í leiknum við Portúgal, einum af fjórum leikjum sem hann lék á HM í Egyptalandi.
Alexander Petersson í leiknum við Portúgal, einum af fjórum leikjum sem hann lék á HM í Egyptalandi. EPA-EFE/Khaled Elfiqi

Alexander Petersson er á leið til þýska úrvalsdeildarliðsins Melsungen þar sem hann mun leika undir stjórn Guðmundar Guðmundssonar.

Frá þessu er greint á vefmiðlinum handball.leaks. Melsungen mun kynna nýjan leikmann klukkan 17:00 í dag og það ku vera Alexander.

Alexander samdi við Flensburg í lok janúar eftir að hann yfirgaf Rhein-Neckar Löwen. Hann hefur leikið níu leiki með Flensburg í þýsku úrvalsdeildinni og skorað sjö mörk.

Hjá Melsungen hittir Alexander ekki bara fyrir Guðmund heldur einnig Arnar Frey Arnarsson og Elvar Örn Jónsson sem kemur til liðsins frá Skjern í sumar.

Þetta verður í annað sinn sem Guðmundur fær Alexander í félagslið sem hann þjálfar en hann fékk hann einnig til Löwen 2012. Þá hefur Alexander lengi leikið undir stjórn Guðmundar í íslenska landsliðinu, nú síðast á HM í Egyptalandi í janúar.

Melsungen ætlar sér stóra hluti á næsta tímabili en auk Alexanders og Elvars hefur liðið samið við portúgalska landsliðsmanninn André Gomes. Melsungen er í 9. sæti þýsku úrvalsdeildarinnar með 29 stig en liðið á nokkra leiki inni.

Alexander, sem verður 41 árs í byrjun júlí, hefur leikið í Þýskalandi síðan 2004.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.