Innlent

Þór­ólfur líkti stöðu sinni við slökkvi­liðs­mann með bundnar hendur

Jakob Bjarnar skrifar
Þórólfur lýsti þröngri stöðu sinni á maraþonfundi velferðarnefndar á miðvikudag. Samfylkingarfólk telur einsýnt að Svandís Svavarsdóttir sé milli tveggja elda; Þórólfs og sannfæringar sinnar og svo samstarfsmanna í Sjálfstæðisflokknum sem vilja ekki skemur í valdheimildum.
Þórólfur lýsti þröngri stöðu sinni á maraþonfundi velferðarnefndar á miðvikudag. Samfylkingarfólk telur einsýnt að Svandís Svavarsdóttir sé milli tveggja elda; Þórólfs og sannfæringar sinnar og svo samstarfsmanna í Sjálfstæðisflokknum sem vilja ekki skemur í valdheimildum. vísir/vilhelm

Samfylkingarfólk heldur því fram að Svandís Svavarsdóttir sé milli tveggja elda: Þórólfs og eigin sannfæringar annars vegar og hins vegar Sjálfstæðisflokksins.

Á maraþonfundi velferðarnefndar á miðvikudaginn, en seinna þá um nóttina voru ný lög samþykkt frá Alþingi sem þar sem gefnar voru út heimildir til að skikka fólk í sóttkví frá hááættusvæðum, kvartaði Þórólfur Guðnason sóttvarnarlæknir undan því að hendur hans væru bundnar.

Fjölmargir voru kallaðir fyrir nefndina, meðal annarra Þórólfur sem líkti stöðu sinni við slökkviliðsstjóra. Hann sagði að lögin megi ekki og geti ekki verið þannig að alltaf þegar slökkviliðsmaðurinn er á leið að brennandi húsi þurfi hann að byrja á að ræða við stjórnmálamenn á leiðinni – til að fá heimildina framlengda eða útfærða nánar til að fá að slökkva eldinn.

Í brýnu sló milli Svandísar og minnihlutans

Á þingfundi um nóttina vitnaði Helga Vala Helgadóttir þingmaður Samfylkingarinnar óbeint til þessa og gerði þetta líkingarmál að sínu í ræðu sinni þegar hún gerði grein fyrir breytingartillögu sinni. Sló í brýnu í sjálfri atkvæðagreiðsluna þegar liðið var fram á morgun, þegar þingmenn gerðu grein fyrir atkvæði sínu. 

En þá þótti þingmönnum minnihlutans Svandís Svavarsdóttir heilbrigðisráðherra vega ómaklega að sér þegar hún lagði frumvarpið fram og sagði eitthvað á þá leið að þingmenn hlytu nú að geta verið sammála um að stemma bæri stigu við útbreiðslu veirunnar og færu ekki að tala um eitthvað annað; nota þetta í pólitískum tilgangi.

Sérstaklega tóku þingmenn Samfylkingarinnar orðum Svandísar illa og töldu ómaklega að sér vegið. Logi Einarsson sagði það ömurlegt í fari fólks þegar það léti vandræðagang innan sinna raða bitna á öðrum. Helgu Völu sárnaði þessi ummæli mjög og sagði þetta aumt útspil og sagði einsýnt að ráðherra teldi ekki vert að fara að tilmælum Þórólfs. Oddný Harðardóttir sagðist hafa orðið fyrir vonbrigðum með ræðu Svandísar en taldi ljóst að hún væri að beina orðum sínum til samstarfsmanna sinna í ríkisstjórn, nefnilega Sjálfstæðismönnum.

Milli tveggja elda

Þórólfur hefur nú skilað Svandís minnisblaði um aðgerðir á landamærum vegna nýrra laga um að skikka megi fólk frá hááhættusvæðum í sóttvarnahús. Þetta kemur fram í frétt á vef Ríkisútvarpsins. Lögin gera ráð fyrir því að hann skilgreini hvaða lönd séu hááhættusvæði eftir fjölda smita, nýgengi þeirra og þeim veiruafbrigðum sem þar greinast. Að sögn fréttastofu Ríkisútvarpsins eru ekki lagðar fram tillögur að aðgerðum innanlands í minnisblaðinu.

Í samtali við Samfylkingarfólk kemur fram að það telur blasa við að Svandís sé milli tveggja elda, sannfæringar sinnar og Þórólfs annars vegar og svo Sjálfstæðismanna hins vegar. Sumir vilja ganga svo langt að tala um ríkisstjórn Sjálfstæðisflokksins og að hún sé alltaf tveimur vikum of sein til með sínar aðgerðir.

Sigríður Á. Andersen þingmaður Sjálfstæðisflokksins greiddi atkvæði gegn frumvarpinu meðal annars á þeim forsendum að ýmislegt í texta frumvarpsins væri of afstætt til að það væri boðlegt í lagatexta. Kom það fram í ræðu hennar um nóttina, þegar frumvarpið var afgreitt. Athygli vakti að tveir ráðherrar Sjálfstæðisflokksins, þau Guðlaugur Þór Þórðarson utanríkisráðherra og Þórdís Kolbrún Gylfadóttir Reykfjörð ferðamálaráðherra voru fjarverandi við atkvæðagreiðsluna.


Tengdar fréttir

Frumvarpið samþykkt á Alþingi í nótt

Frumvarp Svandísar Svavarsdóttur heilbrigðisráðherra um breytingar á sóttvarnalögum og lögum um útlendinga, þar sem kveðið er á um sóttvarnahús og för yfir landamæri, var samþykkt á Alþingi á fimmta tímanum í nótt. Frumvarpið var samþykkt með 28 atkvæðum gegn tveimur, 22 greiddu ekki atkvæði og ellefu voru fjarstaddir.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.