Innlent

Svandís segir aðgerðirnar tímabundnar og afmarkaðar en brýnar

Heimir Már Pétursson skrifar
Svandís Svavarsdóttir mælti fyrir stuttu bandormsfrumvarpi ríkisstjórnarinnar um aðgerðir á landamærunum á Alþingi í dag. Reiknað er með að það verði að lögum strax á morgun.
Svandís Svavarsdóttir mælti fyrir stuttu bandormsfrumvarpi ríkisstjórnarinnar um aðgerðir á landamærunum á Alþingi í dag. Reiknað er með að það verði að lögum strax á morgun. Stöð 2/Arnar

Heilbrigðisráðherra segir Íslendinga ekki mega láta kappið bera sig ofurliði í aðgerðum gegn covid 19 og gæta meðalhófs. Nýjustu aðgerðirnar miði að því að taka harðar á þeim sem komi til landsins frá hááhættusvæðum. Reiknað er með að frumvarp ríkisstjórnarinnar um breytingar á sóttvarna- og útlendingalögum verði lögfest í kvöld.

Svandís Svavarsdóttir heilbrigðisráðherra mælti fyrir bandormsfrumvarpi ríkisstjórnarinnar um breytingar á sóttvarna- og útlendingalögum í dag. Stefnt er að því að ljúka nefndarstörfum og annarri og þriðju umræðu í kvöld þannig að lögin taki gildi á morgun og þar með þær viðbótaraðgerðir á landamærum sem ráðherrar kynntu í gær.

Frumvarpinu hefur almennt verið vel tekið á Alþingi þótt vissulega hafi komið fram athugasemdir frá stjórnarandstöðunni sem ræddar verða í velferðarnefnd.

Svandís Svavarsdóttir segir stöðuna nú allt aðra en áður vegna þess hvað bólusetningar gangi vel. Ekki megi láta kappið bera sig ofurliði í aðgerðum sem skerði athafnir fólks.Stöð 2/Arnar

Heilbrigðisráðherra sagði aðgerðir í frumvarpinu afmarkaðar og tímabundnar.

„Það liggur á að afgreiða málið vegna þess að við þurfum og viljum koma í veg fyrir þau smit sem koma um landamæri eins og nokkur er kostur,“ sagði Svandís.

Frumvarpið skyldar fólk frá tilteknum svæðum miðað við útbreiðslu covid 19 til að fara í sóttvarnahús milli skimana eftir komuna til landsins. Þá veitir það heimildir til að takmarka komu fólks frá frá sömu svæðum nema í brýnum erindagjörðum.

„Við þurfum auðvitað að gæta mjög vel að því í hverju skrefi í þessum faraldri að láta ekki kappið bera okkur ofurliði. Við erum núna stödd þar að það eru afar fáir á sjúkrahúsi. Það eru mjög fáir alvarlega veikir. Við erum komin mjög vel af stað með bólusetningar,“ sagði heilbrigðisráðherra. Vonandi verði hægt að aflétta öllum sóttvarnatakmörkunum ekki síðar en um mitt sumar.

Harðasta gagnrýnin á frumvarpið kemur frá Flokki fólksins sem leggur fram breytingatillögur. Flokkurinn vill mun harðari aðgerðir á landamærunum sem fela í sér að skylda alla á sóttkvíarhótel í sjö daga á milli tveggja skimana eftir komuna til landsinis.

Inga Sæland formaður Flokks fólksins vill ganga miklu lengra í aðgerðum á landamærunum en stjórnvöld gera í frumvarpi sínu.Stöð 2/Arnar

Inga Sædal formaður flokksins sagði málflutning heilbrigðisráðherra mótsagnakenndan.

„Það er til dæmis verið að tala um, við skulum segja, að hindra fólk í sínu daglega lífi. Það sé verið að reyna að koma í veg fyrir það. Samt sem áður erum við búin að vera meira og minna hlekkjuð hér inni og hindruð í okkar daglega lífi,“ sagði Inga.

Ummæli hennar kölluðu á hörð viðbrögð frá heilbrigðisráðherra.

„Ég hafna málflutningi háttvirts þingmanns. Ég hafna því að Íslendingar og landsmenn hér hafi meira og minna hlekkjuð í sínu daglega lífi. Það er rangt,“ sagði Svandís Svavarsdóttir.


Tengdar fréttir

Um 700 gestir með Covid-19 en enginn smitað frá sér

Ekkert smit frá upphafi faraldursins hér á landi má rekja til dvalar á sóttkvíarhótelum eða í farsóttarhúsi, jafnvel þótt þúsundir farþega og um 700 smitaðir hafi dvalist á slíkum stöðum.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.