Innlent

„Það hafa verið svona smáhrinur á þessu svæði síðustu daga“

Hólmfríður Gísladóttir skrifar
Salóme segir erfitt að segja til um það hvort skjálftavirknin tengist flekahreyfingum eða spennubreytingum vegna gossins. Þá sé sömuleiðis erfitt að spá fyrir um framhaldið; hvort skjálftinn í gær var tilfallandi.
Salóme segir erfitt að segja til um það hvort skjálftavirknin tengist flekahreyfingum eða spennubreytingum vegna gossins. Þá sé sömuleiðis erfitt að spá fyrir um framhaldið; hvort skjálftinn í gær var tilfallandi. Vísir/Egill

„Það voru einhverjir skjálftar þarna á eftir og búnir að vera í nótt en miklu minni; bara svona frekar róleg eftirvirkni,“ segir Salóme Jórunn Bernharðsdóttir, náttúruvársérfræðingur hjá Veðurstofu Íslands, um eftirleik „stóra“ skjálftans á Reykjanesskaga í gærkvöldi.

Sá var 4,1 og sá stærsti sem mælst hefur á Reykjanesskaga síðan 15. mars, eða fjórum dögum áður en eldgosið við Fagradalsfjall hófst.

„Hvort þetta séu bara hreyfingar á flekaskilum eða hvort þetta séu einhverjar spennubreytingar vegna gossins er svolítið erfitt að segja núna en þetta er ekkert óvenjulegur staður fyrir skjálfta og það hafa verið svona smáhrinur á þessu svæði síðustu daga,“ segir Salóme.

Stærsti eftirskjálftinn sem mældist í nótt var 3,2 að stærð.

Einhverjar vangaveltur voru uppi í Facebook-hópnum Jarðsöguvinir í gærkvöldi um að ný sprunga hefði opnast en Salóme segist ekki getað séð það á myndavélum. 

„Ef það var þá var hún vel inni á því svæði sem nú er undir hrauni. Þetta er ekki ný opnun á nýju svæði,“ segir hún.

Nú í morgunsárið er suðvestlæg átt ríkjandi og berst því gasmengun yfir höfuðborgarsvæðið. Búast má við hækkuðum SO2 gildum, að sögn Óla Þórs Árnasonar vaktaveðurfræðings.

„Með kvöldinu fer hann meira í suðaustan og þá eru þetta Vogar og Reykjanesbær sem gætu fundið fyrir einhverju. En það verður sæmilegur vindur og úrkoma og það kæmi á óvart ef það mældust há gildi,“ segir Óli.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.