Rafíþróttir

Solskjær fjárfestir í rafíþróttafyrirtæki frá heimaborginni

Ingvi Þór Sæmundsson skrifar
Ole Gunnar Solskjær styður við bakið á norsku rafíþróttafyrirtæki.
Ole Gunnar Solskjær styður við bakið á norsku rafíþróttafyrirtæki. Getty/Rui Vieira

Nýstofnuðu norsku rafíþróttafyrirtæki barst góður liðsstyrkur þegar knattspyrnustjóri Manchester United, Ole Gunnar Solskjær, fjárfesti í því.

ULTI er ný norsk umboðsskrifstofa fyrir rafíþróttafólk sem er með um fimmtán leikmenn og þjálfara á sínum snærum. Þrátt fyrir að vera nýstofnað hefur fyrirtækið þegar skilað miklum hagnaði.

Stofnandi fyrirtækisins, Asgeir Kvalvik, er frá Kristiansund, sömu borg og Solskjær. Hann hefur nú fjárfest í fyrirtækinu ásamt umboðsmanni sínum, Jim Solbakken. Hvor um sig keypti 12,5 prósenta hlut í ULTI.

„Rafíþróttir hafa orðið stærri en nokkurn hefði órað fyrir nokkrum árum. Þetta breiðir út fagnaðarerindi íþróttanna um allan heim. Mér finnst þetta spennandi. ULTI er fyrirtæki með stóra drauma. Þetta snýst um að finna leikmenn og gefa þeim tækifæri,“ sagði Solskjær í yfirlýsingu frá ULTI.

Kvalvik er að vonum ánægður og stoltur með liðsstyrkinn sem ULTI hefur borist og segir að aðkoma Solskjærs hjálpi fyrirtækinu, sérstaklega á alþjóða vettvangi.

Solskjær var duglegur að spila Championship Manager tölvuleikinn þegar hann lék með United og sagði að það hefði hjálpað sér inni á vellinum.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.