Golf

Hideki Matsuyama skrifaði nýjan kafla í sögu Masters

Arnar Geir Halldórsson skrifar
Hideki Matsuyama.
Hideki Matsuyama. vísir/Getty

Japaninn Hideki Matsuyama varð í kvöld fyrsti Asíumaðurinn til að sigra hið goðsagnakennda Masters mót í golfi.

Mótið fór fram á Augusta golfvellinum í Georgíufylki Bandaríkjanna um helgina og var lokahringsins beðið með mikilli eftirvæntingu enda hafði enginn af þeim sem voru meðal fimm efstu fyrir lokahringinn unnið Masters mótið áður og raunar Justin Rose sá eini sem hafði áður unnið risamót.

Hinn 29 ára gamli Matsuyama hafði fjögurra högga forystu þegar lokahringurinn hófst og var stöðu hans á toppnum ekki ógnað að verulegu leyti.

Bandaríkjamaðurinn Xander Schauffele komst næst því að ógna Matsuyama og munaði aðeins tveimur höggum á þeim þegar átti eftir að leika þrjár holur. Á 16.holu fór Schauffele hins vegar illa að ráði sínu og klúðraði sínu tækifæri með því að skjóta ofan í vatn.

Annar Bandaríkjamaður, hinn 24 ára gamli Will Zalatoris, setti pressu á Matsuyama fyrir síðustu tvær holurnar en Zalatoris kláraði mótið á undan Matsuyama og lauk keppni á samtals níu höggum undir pari.

Matsuyama stóðst pressuna á lokametrunum og stóð uppi sem sigurvegari á samtals tíu höggum undur pari. Hann vann þar með sitt fyrsta risamót á ferlinum. Varð hann jafnframt fyrsti Asíumaðurinn í 85 ára sögu Masters mótsins til að vinna mótið.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.