Viðskipti innlent

Netagerðarmeistari lifir á loðnuvertíð fram eftir ári

Kristján Már Unnarsson skrifar
Hugi Árbjörnsson, netagerðarmeistari hjá Hampiðjunni í Neskaupstað, dregur inn loðnunót Beitis.
Hugi Árbjörnsson, netagerðarmeistari hjá Hampiðjunni í Neskaupstað, dregur inn loðnunót Beitis. Einar Árnason

Nýafstaðin loðnuvertíð færir netaverkstæðum kærkomna búbót sem endist þeim langt fram eftir ári. Dæmi um slíkt fundum við austur í Neskaupstað.

Síðasta verkefni skipverjanna á Beiti á loðnuvertíðinni var að skola úr nótinni í Norðfjarðarflóa áður en þeir sigldu að sérstakri bryggju Hampiðjunnar þar sem nótin var tekin til geymslu, en þetta mátti sjá í fréttum Stöðvar 2.

Netaverkstæði Hampiðjunnar í Neskaupstað.Einar Árnason

„Þetta er nýja netaverkstæði Hampiðjunnar í Neskaupstað,“ segir Hugi Árbjörnsson netagerðarmeistari og staðhæfir að það sé það langflottasta. Hér vinna sjö til níu starfsmenn, einkum að viðgerðum á veiðarfærum.

Þegar við sjáum risastóra loðnunót Beitis dregna inn í húsið spyrjum við hvað svona nót kostar.

„80 til 100 milljónir,“ svarar Hugi.

Skipið leggst beint upp að húsi Hampiðjunnar og því handhægt að koma nótinni úr skipinu og inn í netaverkstæðið.Einar Árnason

-Þið eruð náttúrlega mikilvægustu menn bransans?

„Jú, jú.“

-Það væri engin loðna veidd án ykkar?

„Það myndi enginn veiða neitt ef við gerðum ekki fyrir þá veiðarfærin,“ segir netagerðarmeistarinn.

Stóran sal þarf til að gera við loðnunót skips eins og Beitis enda er nótin nærri 500 metra löng og 115 metra djúp.Einar Árnason

En hvað liggja mikil verðmæti í veiðarfærum eins skips eins og Beitis?

„Þeir eru með þrjár nætur, þrjú troll, einhverja tíu poka. Þetta eru einhverjar 400-500 milljónir.“

-Bara í veiðarfærum fyrir eitt skip?

„Eitthvað svoleiðis,“ svarar Hugi.

Netaverkstæðin í Fjarðabyggð fundu sannarlega fyrir loðnubresti.

Jón Björn Hákonarson, bæjarstjóri Fjarðabyggðar.Einar Árnason

„Við auðvitað sjáum hér, bæði á Norðfirði og Eskifirði, stórar og miklar netagerðir, eða veiðarfæragerðir, þar sem er mikil þjónusta við flotann. Þetta hafði mikil áhrif fyrir þá í fyrra þegar loðnan er ekki og loðnunæturnar ekki teknar,“ segir Jón Björn Hákonarson, bæjarstjóri Fjarðabyggðar.

Netagerðarmeistarar fagna því loðnu.

„Hún gerir það að verkum að ég hef verkefni allt sumarið, allt árið, í loðnunótum, sem er rosalega gott,“ segir Hugi Árbjörnsson.

Einnig er fjallað um netaverkstæðið í þættinum Um land allt, um loðnuvertíðina, sem er endursýndur á Stöð 2 í dag, Páskadag, klukkan 13.50.

Hér má sjá frétt Stöðvar 2:


Tengdar fréttir

Alltaf sömu karlarnir því það hættir enginn

Það er enginn undir þrítugu í áhöfn Beitis NK, skipi Síldarvinnslunnar í Neskaupstað, og sá elsti á dekki er 65 ára. Áður fyrr var algengt að sautján-átján ára gamlir strákar væru á loðnuveiðunum.

Höfum öll ofboðslega gott af því að finna hvað heldur okkur gangandi

„Það er bara gaman að vinna á vertíð. Það eru vaktir. Það er fjör. Þú finnur það að þú ert að bjarga verðmætum og að þetta skiptir máli. Ég held að við höfum öll bara ofboðslega gott af því að vera svona með puttann á púlsinum á því hvað heldur okkur gangandi,“ segir Íris Róbertsdóttir, bæjarstjóri í Vestmannaeyjum, um eigin reynslu af því að vinna á loðnuvertíð.

Segir loðnuvertíðina stóran lottóvinning fyrir þjóðarbúið

Núna er áætlað að loðnuvertíðin skili yfir tuttugu milljarða króna útflutningsverðmætum. Þetta kom fram í viðtali við Gunnþór Ingvason, forstjóra Síldarvinnslunnar í Neskaupstað, en þangað var Börkur NK í kvöld á leið með síðasta loðnufarm Austfjarða á þessari vertíð, 1.900 tonna farm. Þá virðist einungis Ísfélag Vestmannaeyja eiga eftir um þúsund tonn óveidd af sínum kvóta.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Mesta hækkun dagsins


Engar hækkanir skráðar í dag

Mesta lækkun dagsins


Engar lækkanir skráðar í dag
Velkomin á Vísi. Þessi vefur notar vafrakökur. Sjá nánar.