Makamál

Bíómyndabónorð við gosið sem heppnaðist fullkomlega

Ása Ninna Pétursdóttir skrifar
Viltu giftast mér?
Viltu giftast mér? Hallmar Thomsen Reimarsson

„Ég var alltaf með einhverja svona bíómyndasenu í huga og þetta var búið að vera á planinu í smá tíma, ég hafði bara aldrei fundið rétta tímann. Svo byrjaði bara að gjósa,“ segir hinn nýtrúlofaði Ásmundur Þór Kristmundsson í samtali við Vísi.

Ásmundur og kærasta hans Sunneva Ósk Axelsdóttir hafa verið saman í sjö og hálft ár. Saman eiga þau eitt barn en Sunneva átti þrjú börn fyrir.

„Þetta gerðist bara í gær og hún vissi ekki neitt, hafði ekki hugmynd. Ég var búin að segja henni frá hugmynd sem ég hafði varðandi það að taka vörumyndir fyrir fyrirtækið hennar, Þriffélagið óskir og þrif. Við vorum að setja saman pakka með nýjum hreinsivörum og áhöldum sem ég stakk upp á að mynda í réttunum hjá ákveðnu þyrlusvæði þar sem gosið yrði í bakgrunn.“

Þegar þau mættu á svæðið fór Ásmundur út og bað Sunnevu að taka til þrifpakkann og gera klárt fyrir myndatökuna. 

„Þegar hún svo leit í átt að gosinu fór hún að hlæja því að það sást ekkert. Ég sagði henni þá að við myndum mynda smá á þessum stað og svo færa okkur nær gosinu. Svo kemur þyrlan og hún áttar sig ekkert á því hvað er að gerast.“

Ásmundur byrjaði að plana bónorðið um leið og það byrjaði að gjósa. Hallmar Thomsen Reimarsson

Ásmundur segir Sunnevu hafa verið mjög hissa þegar hann svo bauð henni að koma í þyrluflugið og hún hafi greinilega ekkert vitað hvað biði hennar.

„Ég var sjálfur ekki stressaður fyrir bónorðinu kannski en samt smá stressaður yfir því að allt myndi ganga upp, án þess að hún tæki eftir því.“

„Þegar við vorum komin að gosstöðvunum löbbuðum við í átt að fjallinu þar sem fólksfjöldinn var en þar sem það var svo mikill halli þar þá sá ég að sá staður hentaði ekki. Ég fann því stað þar sem ég sagðist ætla að taka fyrstu myndina og ljósmyndarinn kom sér fyrir. Sunneva var mjög spennt að halda áfram að labba í átt að fjallinu svo að þetta var allt mjög fyndið.“

 Svo kastaði ég mér bara einhvern veginn niður, fór beint á skeljarnar og bað hana um að giftast mér.

Ásmundur segist lengi hafa langað að bera upp bónorðið en tíminn hafi aldrei verið réttur. Hallmar Thomsen Reimarsson

Ásmundur segist sem betur fer hafa fengið já og bónorðið heppnast fullkomlega.

„Ég man eiginlega ekkert eftir þyrlufluginu til baka því maður var í svo mikilli geðshræringu, en þetta var algjörlega frábært.“ Aðspurður um viðbrögð barnanna við fréttunum segir Ásmundur þau hafa verið mjög skemmtileg og mismunandi.

„Elsta barnið táraðist bara og yngsta barnið var bara alls ekki að trúa þessu,“ segir Ásmundur að lokum.

Vísir óskar nýtrúlofaða parinu innilega til hamingju með eldheitu trúlofunina.

Eldheit ást við glóandi hraunið. Hallmar Thomsen Reimarsson

Tengdar fréttir

Útsýni úr tjaldinu yfir gosstöðvarnar

Aðfaranótt sunnudags lögðu margir leið sína að gosstöðvunum í Geldingardal. Svæðið er sérlega erfitt yfirferðar í myrkri og gangan oft upp í móti svo hún getur tekið á. Þá gerði þokan í nótt mörgum erfitt fyrir.

Biðin eftir bón­orðinu endaði við gos­stöðvarnar

Ólöf Helga Jónsdóttir var á leið með dóttur sinni í leikhús í morgun þegar unnusti hennar, Sigurbjörn Hlöðver Jóhannsson, tilkynnti henni að það yrði breyting á því plani þar sem hann ætlaði með hana í óvissuferð. Óvissuferðin stóð undir nafni og endaði hún með bónorði við gosstöðvarnar í Geldingadal.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.