Viðskipti innlent

Reyna að koma til móts við á­hyggjur rekstrar­­aðila

Eiður Þór Árnason skrifar
Aðgerðirnar voru kynntar á blaðamannafundi ríkisstjórnarinnar í Hörpu í dag. 
Aðgerðirnar voru kynntar á blaðamannafundi ríkisstjórnarinnar í Hörpu í dag.  Vísir/Vilhelm

Ríkisstjórnin hyggst framlengja úrræði á borð við lokunargreiðslur og viðspyrnustyrki út árið en núgildandi lög um slíka styrki renna út á næstu mánuðum. Þá stendur til að framlengja gjaldfresti á stuðningslánum sem er ætlað að styðja við smærri fyrirtæki sem glíma við erfiðleika vegna faraldursins.

Einnig verður þeim sem nýttu sér úrræði til að fresta skattgreiðslum og eru með gjalddaga í sumar gert kleift að dreifa greiðslum yfir tveggja ára tímabil. Ríkisstjórnin vinnur auk þess að því að framlengja heimild einstaklinga til að úttektar á séreignasparnaði.

Þetta kom fram í máli Bjarna Benediktssonar, fjármála- og efnahagsráðherra, á blaðamannafundi ríkisstjórnarinnar í dag þar sem kynntar voru hertar sóttvarnaraðgerðir í ljósi fjölgunar kórónuveirusmita.

Fela þær meðal annars í sér tíu manna samkomubann og lokun leikhúsa, kvikmyndahúsa, líkamsræktarstöðva, sundlauga og skemmtistaða næstu þrjár vikurnar. Bjarni sagði engan vafa á því að margir rekstraraðilar ættu eftir að verða fyrir neikvæðum áhrifum vegna þessa en sagði mikilvægt að stíga fast til jarðar og stytta frekar gildistíma takmarkanna.

Hafði Bjarni sérstaklega orð á því að borið hafi á áhyggjum rekstraraðila sem hafi nýtt sér viss úrræði stjórnvalda og sáu fram á að þurfa að endurgreiða ríkinu áður en reksturinn hafi tekið við sér.

Með framlengingu á gildistíma laga um lokunargreiðslur og viðspyrnustyrki ætluðum rekstraraðilum sem hafa þurft að loka starfsemi eða orðið fyrir verulegri tekjuskerðingu sé tryggt að úrræðin standi áfram til boða ef til frekari lokana komi. Að óbreyttu bjóðast lokunarstyrkir út júní og viðspyrnustyrkir út maí.

Mikilvægt að stíga strax inn í

Bjarni sagði það mjög miður að þurfa að grípa til hertra aðgerða. Það væri þó samdóma álit sérfræðinga að betra sé að stíga snemma inn í og afstýra frekari útbreiðslu veirunnar í staðinn fyrir að bíða og sitja þá uppi með meira íþyngjandi aðgerðir í lengri tíma.

„Þannig erum við að vonast til þess að með því að stíga af krafti inn í stöðuna sem við okkur blasir þá séum við að ná þessum markmiðum sem hafa alltaf verið leiðandi í okkar vinnu, að vernda bæði líf og heilsu fólks og lágmarka efnahagslegan skaða.“

Sautján greindust með kórónuveiruna innanlands í gær. Fjórtán þeirra sem greindust voru í sóttkví, en þrír utan sóttkvíar. Ekki hafa svo margir greinst innanlands á einum degi frá 30. nóvember.


Tengdar fréttir

Ætla að bólusetja aftur með AstraZeneca

Byrjað verður að bólusetja aftur með bóluefni AstraZeneca á næstunni. Svandís Svavarsdóttir, heilbrigðisráðherra, tilkynnti þetta á blaðamananfundi þar sem hertar sóttvarnaaðgerðir voru kynntar í Hörpu í dag.

„Við verðum bara að bregðast við“

Svandís Svavarsdóttir heilbrigðisráðherra segir að hertar aðgerðir vegna kórónuveirunnar hér á landi verði kynntar í dag. Heimir Már Pétursson, fréttamaður okkar, náði tali af Svandísi fyrir ríkisstjórnarfund sem nú stendur yfir í Ráðherrabústaðnum í Tjarnargötu.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×