Enski boltinn

Ótrúleg endurkoma Arsenal

Hjörtur Leó Guðjónsson skrifar
Alexandre Lacazette fagnar jöfnunarmarki sínu vel og innilega.
Alexandre Lacazette fagnar jöfnunarmarki sínu vel og innilega. Justin Tallis - Pool/Getty Images

Arsenal bjargaði þegar þeir heimsóttu West Ham í ensku úrvalsdeildinni í dag. Heimamenn höfðu komist í 3-0, en tvö sjálfsmörk og mark frá Alexandre Lacazette björguðu stigi fyrir skytturnar.

Liðsmenn West Ham naga sig líklega í handabökin eftir leik dagsins. Með sigri hefðu þeir farið upp að hlið Chelsea í fjórða sæti deildarinnar, en þurftu að sætta sig við jafntefli eftir að hafa komist 3-0 yfir.

Jesse Lingard, sem hefur verið sjóðandi heitur síðan hann kom til West Ham frá Manchester United, kom heimamönnum yfir á 16. mínútu.

Lingard lagði svo upp annað mark West Ham mínútu seinna, en þá var það Jarrod Bowen sem koma boltanum í netið.

Tomas Soucek kom heimamönnum í 3-0 á 32. mínútu og útlitið svart fyrir gestina.

Soucek varð svo fyrir því óláni að skora sjálfsmark sex mínútum síðar og smá von fyrir Arsenal þegar liðin gengu til búningsherbergja.

Arsenal minnkaði svo muninn niður í 3-2 með öðru sjálfsmarki leiksins, en í þetta skipti var það Craig Dawson sem setti boltann í eigið net.

Alexandre Lacazette fullkomnaði svo endurkomuna á 82. mínútu eftir undirbúning Nicolas Pepe. Niðurstaðan því 3-3 jafntefli í bráðfjörugum leik.




Fleiri fréttir

Sjá meira


×