Justin Thomas bar sigur úr býtum á Players-meistara­mótinu í golfi

Westwood var í forystu fyrir lokahring mótsins sem fram fór í dag. Hann hafði leikið einstaklega vel en fataðist flugið á síðasta hring. Westwood lék hring dagsins á pari sem gerði það að verkum að Thomas náði að tryggja sér sigurinn með því að spila á fjórum höggum undir pari í dag.

Thomas landaði þar með ótrúlegum sigri en Westwood var með góða forystu fyrir lokahring mótsins. Westwood þurfti því að láta sér nægja annað sæti en í þriðja sæti voru þeir Brian Harman og Bryson DeChambeau á tólf höggum undir pari.

Thomas var klökkur í viðtali að móti loknu en afi hans féll frá fyrir ekki svo löngu síðan.

„Ég vildi óska þess að ég gæti talað við hann en ég veit að hann var að horfa,“ sagði Thomas með tárin í augunum í viðtali eftir að sigurinn var kominn í hús. 

Eins og áður sagði var sigur Thomas í dag ótrúlegur en aldrei hefur kylfingur unnið Players-mótið á jafn fáum höggum og Thomas gerði um helgina. Þá var hann að vinna sitt 14. mót á PGA-mótaröðinni. 

Thomas er fjórði kylfingurinn sem nær þeim áfanga fyrir 28 ára afmæli sitt. Hinir þrír eru Jack Nicklaus, Johnny Miler og Tiger Woods. Ekki amalegur félagsskapur það.