Golf

Lögreglan fékk leitarheimild til að fá að skoða svarta kassann í bíl Tigers

Óskar Ófeigur Jónsson skrifar
Tiger Woods hefur fengið mikinn stuðning frá golfheiminum eftir slysið.
Tiger Woods hefur fengið mikinn stuðning frá golfheiminum eftir slysið. Getty/Mike Ehrmann

Lögreglan í Los Angeles sýslu er ekki búin að loka rannsókninni á bílslysi kylfingsins Tiger Woods.

Bíll Tiger Woods endaði utan vegar í síðustu viku og hann margbraut á sér hægri fótinn í slysinu en var engu að síður heppinn að sleppa svona vel.

Tiger var einn á ferð eldsnemma um morguninn þegar hann virtist missa stjórn á bílnum í beygju en bílinn fór yfir á hina akreinina og svo út af veginum þar sem hann endaði á tré.

Los Angeles lögreglan hafði þegar gefið það út að Tiger hafi ekki verið undir áhrifum þegar hann lenti í slysinu.

Rannsakendur slyssins vildu samt fá meiri upplýsingar um ökuferðina hjá Woods og fengu því leitarheimild til að fá að skoða upplýsingar úr svarta kassanum í bílnum.

Til að fá slíka heimild þá þarf lögreglan að gruna um að eitthvað saknæmt hafi þarna átt sér stað þótt að brotið sé bara vægt afbrot. Lögreglan sjálf gerði hins vegar lítið úr þessu í viðtölum við bandaríska fjölmiðla.

„Við viljum bara að komast að því hvort að einhver glæpur hafi verið framinn. Þegar einhver lendir í bílslysi þá þurftum við að endurskapa áreksturinn og kanna hvort um hafi verið að ræða glannaakstur eða að viðkomandi ökumaður var að taka í farsímann sinn. Við þurfum að finna út úr því hvort að það hafi verið framinn glæpur. Ef svo er ekki þá munum við loka málinu og úrskurða að þarna hafi bara verið á ferðinni venjulegt umferðaróhapp,“ sagði John Schloegl, aðstoðarlögreglustjóri, við USA Today.

Svarti kassinn geymir ýmsar upplýsingar um akstur bílsins eins og hraða hans, stöðu stýrisins og það hvernig og hvenær ökumaðurinn steig á bensíngjöfina og hvenær hann bremsaði.

Það hefur ekki komið í ljós hvaða niðurstöður komu fram við skoðun svarta kassans.




Fleiri fréttir

Sjá meira


×