Lífið

Biðin eftir greiningu tapaðir dagar í lífi þessara barna

Sylvía Rut Sigfúsdóttir skrifar
Laufey Ýr Sigurðardóttir taugalæknir segir að það verði að finna lausn á biðlistum vegna greininga barna.
Laufey Ýr Sigurðardóttir taugalæknir segir að það verði að finna lausn á biðlistum vegna greininga barna. Mission framleiðsla

„Í taugalækningum er sambandið við foreldra og sjúklingana mjög sterkt. Ég held að ég geti talað við allan hópinn okkar, að þessi börn sitja í okkur daginn út og daginn inn,“ segir barnalæknirinn Laufey Ýr Sigurðardóttir.

„Við erum alltaf að velta því fyrir okkur hvernig við getum gert betur og hvernig við getum hjálpað. En við erum ekki með allar lausnir, við erum ekki með lausnir á þessum biðlistum sem eru alls staðar.“

Laufey Ýr er taugalæknir með mikla reynslu og var hún gestur í nýjasta þættinum af Spjallið með Góðvild, sem birtist á Vísi og helstu efnisveitum í dag. Þar ræddi hún meðal annars um biðlistana hér á landi.

„Hver dagur sem eitthvað barn á Íslandi situr á biðlista eftir greiningu, hvort sem það er þroskafrávik, alvarlegur sjúkdómur, hegðunarröskun, geðröskun, hvað sem það er, þetta er tapaður dagur í lífi þessara barna.“

Laufey er margra barna móðir og á sjálf átta börn.

Þyngra en tárum taki

Að hennar mati væri hægt að gera mun betur og bíður hún fram sína aðstoð við það. Laufey er átta barna móðir sjálf. Eins og staðan er núna eru sum börn í mörg ár á biðlista.

„Það er margt búið að reyna. Þegar ég var á Greiningarstöðinni þá skildi maður erfiðleikana, ég skil erfiðleikana. En við verðum að finna lausn. Einhvern veginn finnst mér við ekki geta stofnað enn eitt nýtt batteríið.“

Laufey Ýr segir að það sé ekki hægt að hafa kerfið þannig að barn fari í frumgreiningu og lendi svo í bið eftir næsta skrefi og svo er frumgreiningin kannski orðin úrelt þegar þar að kemur.

„Þetta er þyngra en tárum taki. Ég vildi svo gjarnan að maður gæti einhvern veginn komið þessu í þannig farveg að það sé hægt að gera þetta hraðar og bregðast fyrr við.“

Hægt er að hlusta á viðtalið í heild sinni í spilaranum hér fyrir neðan.

Klippa: Spjallið með Góðvild - Laufey Ýr Sigurðardóttir

Þættirnir Spjallið með Góðvild eru sýndir á Vísi á þriðjudögum. Verkefnið er afurð margra ára samstarfs Sigurðar Hólmars Jóhannessonar sem er í stjórn Góðvildar og Ágústu Fanneyjar Snorradóttur kvikmyndagerðarkonu og eiganda Mission Framleiðslu. Þáttastjórnendur eru Sigurður Hólmar Jóhannesson, Þórunn Eva Pálsdóttir og Ásdís Arna Gottskálksdóttir.

Þættirnir eru nýr vettvangur til að koma málefnum langveikra og fatlaðra barna á framfæri og auka í leiðinni sýnileika fyrir mikilvæg málefni. Hægt er að hafa samband við Sigurð og Ágústu Fanney vegna þáttanna í gegnum vefsíðuna www.godvild.is eða samfélagsmiðla félagsins. Með því að styrkja Góðvild þá ertu að styðja við langveik og fötluð börn á Íslandi. Styrktarreikningur 0301-26-660117, kennitala 6601172020.


Tengdar fréttir




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.