Fótbolti

Betur undirbúinn en þegar símtalið endasleppa barst 2018

Sindri Sverrisson skrifar
Ásmundur Haraldsson aðstoðarlandsliðsþjálfari, Þorsteinn Halldórsson landsliðsþjálfari og Guðni Bergsson formaður KSÍ, á kynningarfundinum í Laugardal í dag.
Ásmundur Haraldsson aðstoðarlandsliðsþjálfari, Þorsteinn Halldórsson landsliðsþjálfari og Guðni Bergsson formaður KSÍ, á kynningarfundinum í Laugardal í dag. Vísir/Egill

Þorsteinn Halldórsson segist ekki hafa verið tilbúinn til að taka við íslenska kvennalandsliðinu í fótbolta þegar hann fékk símtal, sem reyndist reyndar endasleppt, frá KSÍ árið 2018. Nú sé hann reynslumeiri og betri þjálfari.

„Annað hvort gerir maður þetta núna eða kannski aldrei,“ sagði Þorsteinn við Vísi í höfuðstöðvum KSÍ í dag, eftir að hafa verið kynntur sem nýr landsliðsþjálfari.

Þorsteinn, sem er 52 ára, hefur náð frábærum árangri með Breiðabliki á síðustu sex árum og meðal annars fagnað þremur Íslandmeistaratitlum, tveimur bikarmeistaratitlum og góðum árangri í Meistaradeild Evrópu. Nú er hann tekinn við landsliðinu sem óvænt missti þjálfara sinn þegar Jón Þór Hauksson hætti fyrir tveimur mánuðum, eftir að hafa stýrt liðinu áfram úr undankeppni EM.

Klippa: Þorsteinn Halldórsson um nýja starfið og landsliðið

„Þetta leggst bara vel í mig. Ég var nú ekki búinn að horfa til þessa starfs lengi enda bar þetta brátt að þannig séð, og ég var ekkert á leiðinni frá Breiðabliki,“ sagði Þorsteinn við Vísi.

Þorsteinn sagði frá því í Pepsi Max mörkunum síðasta sumar að hann hefði komið til greina í landsliðsþjálfarastarfið þegar Jón Þór var ráðinn 2018. „Ég veit ekki hvernig ég á að orða þetta. Mér var í sjálfu sér ekki boðið starfið en það var hringt í mig og spurt hvort ég hefði einhvern áhuga að koma og hitta þau. Ég var efins og það var liggur við bara skellt á mig,“ sagði Þorsteinn þá í viðtali við Helenu Ólafsdóttur

Aðspurður hvort þetta hefði ekki setið í honum núna svaraði þjálfarinn:

„Ég var ekki tilbúinn þá. Þetta snerist meira um mig heldur en þá. Ég tel mig vera meira tilbúinn núna og lít svolítið á það þannig að annað hvort gerir maður þetta núna eða kannski aldrei.

Ég bý yfir meiri reynslu núna. Búinn að spila fleiri Evrópuleiki. Gera góða hluti, og betri hluti eftir því sem árin hafa liðið. Þess vegna tel ég mig betur undirbúinn núna.“

Elísabet örugglega verið hvalreki fyrir landsliðið

Elísabet Gunnarsdóttir greindi frá því í viðtali við Fótbolta.net í byrjun vikunnar að hún væri „drullusvekkt“ að hafa ekki fengið landsliðsþjálfarastarfið nú. Guðni Bergsson, formaður KSÍ, sagði ástæðuna þá að KSÍ vildi ekki að landsliðsþjálfari sinnti öðru starfi en Elísabet hugðist þjálfa Kristianstad út þetta ár. Þorsteinn segir þetta ekki hafa áhrif á sig:

„Alls ekki. Hún er mjög góður þjálfari og það hefði örugglega verið hvalreki fyrir landsliðið að fá hana. En ég get svo sem ekkert tjáð mig um af hverju [hún var ekki ráðin] eða eitthvað slíkt. Það er eitthvað sem ég hef enga stjórn á.“

Þorsteinn Halldórsson hefur náð frábærum árangri sem þjálfari Íslandsmeistara Breiðabliks.vísir/Hulda Margrét

Forréttindi að vera komin á EM en þarf að ná árangri í undankeppni HM

Sem fyrrverandi þjálfari Breiðabliks gjörþekkir Þorsteinn margar af landsliðskonum Íslands og hann er spenntur fyrir komandi tímum. Ísland leikur í lokakeppni EM sumarið 2021 en byrjar leið sína að HM 2023 með leikjum í undankeppninni í haust. Í febrúar er framundan mjög sterkt æfingamót með Frakklandi, Noregi og Sviss:

„Hópurinn er góður. Ungar stelpur hafa verið að koma upp, tóku svolítið stór hlutverk eftir því sem leið á síðustu keppni, og þróunin á liðinu er bara góð. Ég tek við góðu búi og það eru forréttindi að vera komin í Evrópukeppnina. En auðvitað er þetta starf alltaf árangursmiðað. Ég þarf að ná árangri í undankeppninni fyrir HM líka, því auðvitað stefnum við á að komast á HM. Við þurfum að nota næstu mánuði vel til að undirbúa okkur og vera klár í haust.

Ég vil bara sjá liðið verða betra. Við þurfum að halda áfram að gera liðið betra, bæta í, og markmiðið sem við stefnum að núna er að komast á HM. Í framhaldinu kemur svo EM [sumarið 2021] og við þurfum að skoða hvað við ætlum að gera þar,“ sagði Þorsteinn og kvaðst bæði brattur og bjartsýnn.

Var ekki á staðnum og veit ekkert hvað var í gangi

Aðspurður hvað honum fyndist um ákvörðun forvera síns í starfi, að hætta eftir að hafa að eigin sögn farið yfir strikið í samtölum við leikmenn þegar EM-sætinu var fagnað, svaraði Þorsteinn:

„Ég hef í sjálfu sér enga beina skoðun á þessu. Ég var ekki á staðnum og veit ekkert hvað var í gangi þarna, þannig að ég hef í raun og veru ekkert til að tjá mig um það.“


Tengdar fréttir

Fjögur komu til greina og voru öll íslensk

Guðni Bergsson formaður KSÍ segir það hafa verið ákveðið lúxusvandamál hve góðir umsækjendur sóttust eftir starfi landsliðsþjálfara kvenna í fótbolta. Mikil ánægja sé með að hafa á endanum getað ráðið Þorstein Halldórsson sem náð hefur frábærum árangri sem þjálfari Breiðabliks.

„KSÍ er að fá frábæra persónu og frábæran þjálfara“

Framkvæmdastjóri Breiðabliks, Eysteinn Pétur Lárusson, segir að Blikar sjái á eftir Þorsteini Halldórssyni en samgleðjist honum jafnframt að vera orðinn þjálfari íslenska kvennalandsliðsins í fótbolta. Eysteini segir að Þorsteinn sé afar fær í sínu starfi.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.