Patrekur skaut Marokkómenn í kaf

Íslendingar eru í 2. sæti F-riðils með tvö stig og komast í milliriðil svo lengi sem þeir tapa ekki leiknum í kvöld. Marokkómenn hafa tapað báðum leikjum sínum á HM.

Þetta er aðeins í annað sinn sem Ísland og Marokkó mætast frá upphafi. Eini leikur liðanna til þessa var á HM í Frakklandi 2001.

Ísland 31-23 Marokkó, HM 2001

Íslendingar hófu riðlakeppnina á HM 2001 á því að tapa fyrir heimsmeisturum Svía, 24-21, en unnu svo Portúgali í öðrum leik sínum, 22-19. Í þriðju umferð riðlakeppninnar mætti Ísland svo Marokkó.

Íslenska liðið átti í vandræðum í fyrri hálfleik en var þó þremur mörkum yfir að honum loknum, 16-13.

Ísland byrjaði seinni hálfleikinn af miklum krafti, gekk hreint til verks og kláraði leikinn. Mestur varð munurinn tólf mörk, 29-17. Ísland gaf eftir á lokakaflanum og Marokkó lagaði stöðuna. Sigurinn var þó aldrei í hættu og á endanum munaði átta mörkum á liðunum, 31-23.

Patrekur Jóhannesson fór mikinn í leiknum, skoraði níu mörk og gaf fjölda stoðsendinga. Einar Örn Jónsson skoraði sex mörk úr jafnmörgum skotum og Ólafur Stefánsson skilaði einnig sex mörkum. Guðmundur Hrafnkelsson, sem var fyrirliði Íslands í leiknum, varði vel í markinu, alls 22 skot.

Sigurinn á Marokkó var síðasti sigur Íslands á HM 2001. Íslendingar fengu eitt stig út úr síðustu tveimur leikjunum í riðlakeppninnar og töpuðu svo fyrir Júgóslövum, 27-31, í sextán liða úrslitunum.

Mörk Íslands: Patrekur Jóhannesson 9, Einar Örn Jónsson 6, Ólafur Stefánsson 6/4, Guðjón Valur Sigurðsson 4, Róbert Julian Duranona 3, Ragnar Óskarsson 2, Róbert Sighvatsson 1.