Handbolti

Leikmenn þriggja liða og portúgalskur blaðamaður með smit við komuna á HM

Sindri Sverrisson skrifar
Allir sem mæta á HM í Egyptalandi, þar á meðal Alfreð Gíslason þjálfari Þjóðverja, eru hitamældir og fara svo í smitpróf vegna kórónuveirunnar. Þjóðverjar eiga að mæta Grænhöfðaeyjum á sunnudaginn en fjöldi smita hefur greinst hjá þeim.
Allir sem mæta á HM í Egyptalandi, þar á meðal Alfreð Gíslason þjálfari Þjóðverja, eru hitamældir og fara svo í smitpróf vegna kórónuveirunnar. Þjóðverjar eiga að mæta Grænhöfðaeyjum á sunnudaginn en fjöldi smita hefur greinst hjá þeim. Getty/Sascha Klahn

Tvö lið urðu að hætta við HM í handbolta vegna kórónuveirusmita, eitt ákvað að senda varalið vegna smithættu, og í gærkvöld var greint frá því að þrjú lið hefðu ferðast til Egyptalands með smitaða leikmenn.

Það er óhætt að segja að heimsfaraldurinn setji mikinn svip á heimsmeistaramótið í handbolta og kannski ekki að undra að handboltasérfræðingar TV2 í Danmörku og Noregi telji ómögulegt að halda mótinu áfram.

Í gærkvöld greindi alþjóða handknattleikssambandið, IHF, frá því að fjórir leikmenn Grænhöfðaeyja hefðu greinst með veiruna við komuna til Egyptalands, tveir leikmenn Slóveníu, einn leikmaður Brasilíu og fjölmiðlamaður frá Portúgal. Þá hefði bandarískur leikmaður einnig greinst með veiruna en farið í einangrun á flugvellinum.

Tíu leikmenn úr leik hjá Grænhöfðaeyjum

Grænhöfðaeyjar höfðu áður misst út sex leikmenn og þjálfarann sinn vegna smita en ákváðu samt að mæta á HM, og nú hafa fjórir leikmenn til viðbótar greinst. Hollendingar voru í startholunum til að koma inn sem varaþjóð en ekki ku verða af því. 

Áhorfendur eru bannaðir á HM vegna heimsfaraldursins.EPA/Henning Bagger

Bandaríkin og Tékkland hættu við HM vegna hópsmita, og Suður-Kórea ákvað að senda varalið vegna smithættunnar – varalið sem tapaði 51-29 gegn Slóveníu í gær. Sviss og Norður-Makedónía komu inn sem varaþjóðir.

Portúgalinn ekki á leiknum við Ísland

IHF segir að allur leikmannahópur Grænhöfðaeyja og Brasilíu fari í smitpróf í dag, búið sé að senda Slóvena í smitpróf, og að portúgalski fjölmiðlamaðurinn hafi ekki verið á leiknum gegn Íslandi í gær heldur farið strax í einangrun.

Grænhöfðaeyjar eiga að spila við Ungverjaland í kvöld, sinn fyrsta leik í sögu HM, og Brasilíumenn mæta Spánverjum í dag.

Allir þátttakendur á HM sem og fjölmiðlamenn, starfsfólk á hótelum liðanna og fleiri, þurfa að fara í smitpróf reglulega. Einnig er skimað fyrir veirunni við komuna til Egyptalands og þar greindust níu jákvæð sýni eins og fyrr segir. Önnur sýni voru neikvæð. 

IHF segir að auk þess hafi nokkur smit greinst á meðal hótelstarfsfólks en það hafi verið áður en að liðin komu á hótelin og starfsfólkið hafi strax verið sett í einangrun.




Fleiri fréttir

Sjá meira


×