Viðskipti innlent

Hvetur til skipaflutninga til að létta á þjóðvegakerfinu

Kristján Már Unnarsson skrifar
Skjöldur Pálmason, framkvæmdastjóri Odda hf. á Patreksfirði.
Skjöldur Pálmason, framkvæmdastjóri Odda hf. á Patreksfirði. Egill Aðalsteinsson

Framkvæmdastjóri Odda á Patreksfirði, stærsta sjávarútvegsfyrirtækis sunnanverðra Vestfjarða, segir galið að allir þungaflutningar landsins fari um þjóðvegakerfið. Hann hvetur til skipaferða og að ferjusiglingar yfir Breiðafjörð verði efldar.

Kvartað er undan því að vegirnir frá Patreksfirði, Tálknafirði og Bíldudal séu illa farnir vegna stóraukinna þungaflutninga. Megnið af afurðum svæðisins fer með trukkum, meðal annars frá Odda á Patreksfirði.

Flutningabíl ekið frá Patreksfirði.Egill Aðalsteinsson

„Við erum mjög háðir landleiðinni núna þar sem engar skipakomur eru hérna á sunnanverða Vestfirði. Skipakomur þyrftu svo sannarlega að bætast hérna við þar sem framleiðsla á þessu svæði er orðin alveg gríðarlega mikil,“ segir Skjöldur Pálmason, framkvæmdastjóri Odda, í viðtali í fréttum Stöðvar 2.

„Og það er náttúrlega í sjálfu sér alveg galið að flytja þetta allt eftir þjóðvegum landsins, sem eru engan veginn búnir undir þetta, og alls ekki hérna til okkar.“

Frá Patreksfjarðarhöfn.Egill Aðalsteinsson

Bryggjur sem taka við flutningaskipum eru þegar til staðar en áætlað hefur verið að á þessu ári þurfa að flytja 25 þúsund tonn af vörum frá svæðinu. 

Þótt endurbætur séu hafnar á þjóðvegum, eins og til dæmis í Gufudalssveit, bendir Skjöldur á að langt sé í að þeim ljúki.

„Við munum hins vegar alltaf skilja eftir hér erfiða fjallvegi, eins og Klettsháls.“

Frá Bíldudalshöfn.Egill Aðalsteinsson

Skjöldur segir að í sínum huga sé langmikilvægast að treysta ferjusiglingar yfir Breiðafjörð með Baldri.

„Hann er algerlega forsendan fyrir því að það sé hægt að stunda hér fiskvinnslu, hvort sem það er lax eða hvítfiskur, í þessari samkeppni. Því að afhendingaröryggið er það sem er númer eitt, tvö og þrjú. 

Og það getum við ekki uppfyllt með því að treysta á það að það sé alltaf fært yfir erfiðustu hálsana hérna á leiðinni suður,“ segir framkvæmdastjóri Odda.

Hér má sjá frétt Stöðvar 2:


Tengdar fréttir

Vestfirðingar vilja láta bora fern ný jarðgöng

Forystumenn á Vestfjörðum telja þörf á minnst fernum nýjum jarðgöngum í fjórðungum til að koma samgöngumálum þar í viðunandi horf; einum á norðanverðum fjörðunum og þrennum á sunnanverðum.

Vilja fá nýjan Baldur strax í siglingar yfir Breiðafjörð

Samgöngumálin brenna á Vestfirðingum sem aldrei fyrr. Umræðan hefur enn og aftur blossað upp eftir óhapp á Hjallahálsi um síðustu helgi þar sem vöruflutningabíll valt. Á sunnanverðum Vestfjörðum vilja samtök atvinnurekenda fá nýjan Baldur strax.

Þessi brú styttir vesturleiðina til Ísafjarðar um níu kílómetra

Ný brú þvert yfir Þorskafjörð, sem styttir vesturleiðina til Ísafjarðar um níu kílómetra, verður boðin út á evrópska efnahagssvæðinu á næstu dögum. Stefnt er að því að framkvæmdir hefjist í kringum páska en þetta gæti orðið stærsta útboðsverk Vegagerðarinnar í ár.

Byrjaðir á fyrsta áfanga vegar um Gufudalssveit

Vinna er hafin við sjö kílómetra vegagerð í Gufudalssveit en þetta er fyrsti áfangi hins umdeilda Teigsskógarvegar. Í sveitinni er því fagnað að verkið skuli hafið. Myndir frá vegagerðinni mátti sjá í fréttum Stöðvar 2.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Mesta hækkun dagsins


Engar hækkanir skráðar í dag

Mesta lækkun dagsins


Engar lækkanir skráðar í dag
Velkomin á Vísi. Þessi vefur notar vafrakökur. Sjá nánar.