Golf

Nýja heimildarmyndin um Tiger Woods frumsýnd næstu tvo sunnudaga

Óskar Ófeigur Jónsson skrifar
Nick Faldo klæðir Tiger Woods í græna jakkann eftir sigur Tigers á Mastersmótinu 1997.
Nick Faldo klæðir Tiger Woods í græna jakkann eftir sigur Tigers á Mastersmótinu 1997. Getty/Sam Greenwood

Michael Jordan og Lance Armstong fengu báðir heimildarmynd á síðasta ári og í upphafi nýs árs þá er komið af ótrúlegri öfgaævi Tiger Woods.

Það bíða margir spenntir eftir því að sjá nýja heimildarmynd um viðburðaríka ævi bandaríska kylfingsins Tiger Woods sem verður frumsýnd í tveimur hlutum í þessum mánuði.

HBO mun frumsýna nýja mynd um Tiger Woods næstu tvo sunnudag en hún heitir einfaldlega Tiger.

Fyrri hlutinn verður sýndur á HBO sunnudaginn 10. janúar og seinni hlutinn viku síðar.

Í fyrri hlutanum verður fjallað um æsku Tigers og hvernig hann varð að besta kylfingi heims. Þar er einnig farið yfir sigursælan feril hans.

HBO's upcoming two-part documentary on Tiger Woods covers the good, the bad and the ugly.

Posted by Sports Illustrated on Miðvikudagur, 6. janúar 2021

Í seinni hlutanum er síðan farið yfir árin eftir að heimur Tiger Woods hrundi þegar upp komst um annað líf hans á bak við tjöldin. Þar er fjallað um skilnaðinn, bakmeiðslin og svo endurkomu hans á Mastersmótinu 2019.

Þeir sem hafa séð heimildarmyndina segja að HBO hlífi ekki neinum í myndinni og fjalli á mjög opinskáan hátt um allt sem gekk á í lífi Tigers, bæði þegar gekk vel og þegar heimurinn hans hrundi.

Michael Jordan fékk að vera með puttana í „The Last Dance“ heimildarmyndinni sinni en Tiger Woods fékk ekkert að koma að þessari heimildarmynd.

Það eru engin viðtöl við Tiger Woods sjálfan, móður hans eða fyrrum eiginkonu hans Elin Nordegren. Það eru hins vegar sýnd myndbrot sem hafa ekki komið fyrir augu almennings áður.

Það eru líka viðtöl við fólk sem var í nánum tengslum við Tiger eins og fyrrum kylfusvein hans Steve Williams, vin föður hans og ævisöguritara hans Pete McDaniels sem og Diana Parr, sem á að vera fyrsta ást Tigers.

Í myndinni er einnig viðtal við Rachel Uchitel um hennar þátttöku í hneykslinu sem breytti því hvernig heimurinn sá Tiger Woods.

Hér fyrir neðan má sjá stiklu um heimildarmyndina.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.