Hagnaður Íslandspósts nam 79 milljónum króna í fyrra

Hagnaður varð af rekstri Íslandspósts hf. á árinu 2008 að fjárhæð 79 milljónir króna og var EBITDA um 522 milljónir króna. Heildartekjur félagsins á síðasta ári námu 6,6 milljörðum króna og höfðu aukist um 7% frá fyrra ári. Heildareignir voru 4,9 milljarðar króna í árslok 2008 og eigið fé nam 2,6 milljörðum króna. Félagið greiddi 90 milljónir króna í arð til ríkissjóðs á árinu.

„Félagið hefur skilað hagnaði frá árinu 2002 en fram að því hafði póstrekstur verið rekinn með verulegu tapi. Rekstur félagsins fór vel af stað á árinu 2008. Áætlanir um rekstur og afkomu gengu vel eftir fram að hausti en seinasti ársfjórðungur bar merki þess samdráttar sem varð í íslensku efnahagslífi í kjölfar hruns fjármálafyrirtækja. Þegar í stað var brugðist við breyttum rekstrarskilyrðum og hafa aðgerðir til lækkunar rekstrarkostnaðar auk sérstakrar hagræðingar í dreifingu pakka og rúmfrekra bréfa tryggt jákvæða afkomu á árinu 2008," segir í tilkynningu frá félaginu.

Íslandspóstur fagnaði 10 ára afmæli sínu á árinu 2008. Það hefur gengið í gegnum miklar breytingar frá stofnun bæði hvað varði skipulag og fyrirkomulag rekstrar sem hafi allar haft þann megintilgang að efla þjónustu við viðskiptavini og bæta aðstöðu og aðbúnað viðskiptavina og starfsmanna sem og að tryggja rekstrargrundvöll Íslandspósts til framtíðar.