Upptökur á Big Bang Theory tefjast vegna kjaradeilna

Framleiðsla áttundu seríu hinna vinsælu grínþátta, Big Bang Theory hefur tafist vegna kjaradeilna leikaranna. Framleiðslufyrirtækið Warner Bros tilkynnti í dag að fyrsti tökudagur eftir sumarfrí hefði tafist. Ekki er vitað hvenær tökur munu hefjast.

AP fréttaveitan segir töfina vera vegna þess að verið sé að semja við leikarana Jim Parsons, Johnny Galecki, Kaley Cuoco, Simon Helberg og Kunal Nayyar.

Enn er þó ekki hægt að segja til um hvort að töfin muni hafa áhrif á hvenær útsending seríunnar hefst, en hún á að byrja þann 22. september.

Nina Tassler hjá CBS Entertainment var vongóð um að samningaviðræðurnar muni ekki dragast á langinn. Það var þó fyrir tveimur vikum.

„Við erum viss um að þetta muni allt ganga upp. Þetta heppnast alltaf á einhvern ótrúlegan máta ár eftir ár,“ sagði Nina við AP fyrir tveimur vikum.