PwC segja endurskoðunarvinnu í samræmi við starfsskyldur

„PricewaterhouseCoopers (PwC) gerir alvarlega athugasemd við þau vinnubrögð að rannsóknarskýrslum opinbers aðila um Glitni banka og Landsbankann, er m.a. varða starfsheiður PwC, sé komið í hendur fjölmiðla til umfjöllunar án þess að PwC hafi verið kynnt efni skýrslnanna."

Þetta kemur fram í yfirlýsingu frá fyrirtækinu en PwC liggja undir þungum ásökunum í tveimur skýrslum sem unnar voru fyrir embætti sérstaks saksóknara og hafa lekið út í fjölmiðla í dag og í gær.

PwC segir að í ljósi þess að fyrirtækið hafi ekki getað kynnt sér ásakanirnar sé ómögulegt að svara þeim alvarlegu ásökunum sem koma þar fram.

Svo segir orðrétt:

„Af hálfu embættis sérstaks saksóknara og rannsóknaraðila á hans vegum hefur ekki verið haft samband við PwC vegna rannsóknar fyrirliggjandi gagna. PwC hefur í dag farið þess á leit við sérstakan saksóknara að fá einnig aðgang að rannsóknarskýrslunum.

Efnislegum athugasemdum verður svarað á réttum vettvangi en PwC áréttar að endurskoðunarvinna félagsins var í fullu samræmi við starfsskyldur endurskoðenda."