Sendu tæplega milljón tölvupósta vegna leiðréttingarinnar

Embætti ríkisskattstjóra sendi alls rúmlega 924 þúsund tölvupósta vegna húsnæðiskuldaniðurfellingar stjórnvalda, sem í daglegu tali er kölluð „leiðréttingin“. Þá bárust embættinu rúmlega 27 þúsund tölvupóstar og 68 þúsund símtöl vegna leiðréttingarinnar.

Þetta kemur fram í uppgjöri Helgu Valborgar Steinarsdóttur, verkefnisstjóra á aðalskrifstofu ríkisskattstjóra, í fréttabréfinu Tíund sem kom út á dögunum.

Í grein Helgu, sem ber nafnið Við lok leiðréttingar, rekur hún í stuttu máli vinnuna sem bjó að baki hinni fordæmalausu og flóknu aðgerð sem skuldaniðurfellingin var.

Starfsmenn embættisins þurftu að vinna hratt að viðamiklu framkvæmdinni sem Helga segir að hafi „með ýmsum óvæntum uppákomum og ófyrirséðum annmörkum“ reynt „iðulega á ystu þolmörk þeirra sem henni sinntu.“  Alls voru 51 þúsund fasteignaveðlán lækkuð og 115 þúsund slík lán endurreiknuð í aðgerðinni en um 250 starfsmenn komu að henni með einum eða öðrum hætti.

Þessir starfsmenn hafa undanfarið spurt sig hvaða lærdóm megi draga af öllu því sem genguð hefur á hjá embætti ríkisskattstjóra undanfarið eitt og hálft ár frá því að ákveðið var að ráðast í skuldalækkunina að sögn Helgu.

„Efst í huga er hvílík staðfesting fengist hefur á kostum rafrænna lausn við svo umfangsmikil störf sem þau er leiddu af Leiðréttingunni,“ segir Helga og bætir við að enginn vafi hafi leikið á að slíkar lausnir hafi gegnt lykilhlutverki í því að afgreiða þann aragrúa mála sem lá fyrir – „svo skjótt sem raun reyndist.“

Í úttektinni kemur fram að um 97 prósent umsækjenda hafi þannig samþykkt lækkunina með rafrænum skilríkjum. Þá fékk vefurinn leidretting.is sem komið var upp af þessu tilefni um 1,2 milljónir heimsókna frá 146 ríkjum.

Nánar má skyggnast inn í aðgerðina í Tíund.