Öll nauðgunarmálin frá Þjóðhátíð upplýst

Búið er að upplýsa öll þrjú nauðgunarmálin sem komu upp á Þjóðhátíð í Vestmannaeyjum um síðastliðna verslunarmannahelgi. Grunur féll á ákveðinn mann þegar hann var tekinn til yfirheyrslu hjá lögreglu í gær.

Lögreglan sendi á dögunum frá sér mynd af manni í tengslum við rannsóknina, en Þorgrímur Óli Sigurðsson, rannsóknarlögreglumaður á Selfossi, segir að hún hafi litlu skilað. „Það voru í raun bara rannsóknarlögreglumennirnir sem voru að vinna í málinu, þegar þeir voru búnir að kanna ýmis atriði, lesa út úr yfirheyrslum og öðru þá komu upp atriði sem þeir vildu kanna betur og það leiddi til þess að þeir fundu þennan mann og hann var yfirheyrður," segir Þorgrímur Óli í samtali við Vísi. „Það var sem sagt bara vinna lögreglumannana sem leiddi til þessa, af því að við fengum ekki ábendingu frá neinum í tengslum við myndbirtinguna," bætir Þorgrímur Óli við.

Lögreglan óskaði eftir gögnum frá símafyrirtækjunum vegna rannsóknar málsins. Símafyrirtækin höfnuðu og eftir að Hæstiréttur hafnaði kröfu lögreglunnar um að Símanum yrði gert að afhenda lögreglu upplýsingar á tíu mínútna tímabili um nóttina varð ljóst að ekkert símafyrirtækjanna myndi láta gögnin af hendi. Þorgrímur Óli segir að þetta hafi tafið fyrir rannsókn málsins. Hugsanlega hefðum við getað fundið þetta út frá símanum " segir hann.

Yfirlögregluþjónn á Selfossi sagðist í hádegisfréttum Bylgjunnar efast mjög um þá tölu að aðeins sé sakfellt í 3% kynferðisafbrotamála yfir allt landið á sama tíma og sakfellt er í 15,9% mála, sem koma á borð lögreglunnar á Selfossi.