Aron: Tímasetningin er afleit

Aron Kristjánsson segist hafa verið afar spenntur fyrir starfi landsliðsþjálfara en að tímasetningin hefði ekki getað verið verri.

Aron varð í dag fjórði þjálfarinn sem HSÍ hefur rætt við um að taka að sér þjálfun íslenska landsliðsins í handbolta sem hafnar boðinu.

Aron er þjálfari Hauka sem tróna á toppi N1-deildar karla í handbolta. Hann segir að hann geti ekki losað sig undan þeim skuldbindingum sem hann hefur þar.

„Þetta er draumastarfið hjá mér og verður vonandi áfram. Þetta er það sem ég hef stefnt að síðan ég fór út í þjálfun en tímasetningin nú er gjörsamlega afleit. Það er bara ekki hægt að horfa framhjá því," sagði Aron við Vísi.

„Allar viðræður við HSÍ gengu mjög vel en það kom fljótt í ljós að það væri ekki hægt að starfa sem landsliðsþjálfari samhliða starfi mínu hjá Haukum."

„Ég er tiltölulega nýkominn til starfa hjá Haukum og þegar ég kom í sumar þurfti að blása nýju lífi í félagið. Þjálfunin er bara hluti af þeirri vinnu og er ég í miðju ókláruðu verkefni. Ég er með skuldbindingar gagnvart leikmönnum, þjálfurum, sjálfboðaliðum og styrktaraðilum félagsins. Ég vil koma þessu verkefni betur frá mér áður en ég tek eitthvað annað að mér."

Aron segist hafa rætt við Hauka um möguleika þess að fá sig lausan. „Ég fann sjálfur að ég var tilbúinn fyrir landsliðsstarfið og vildi ég fá að heyra hvað HSÍ hefði fram að færa."

Hann segir þó hafa mætt skilningi frá HSÍ er hann hafnaði þeim. „Þeir vita vel hvernig málin standa gagnvart Haukunum og gera sér fulla grein fyrir minni stöðu."