Landsbankinn yfir Íslandsbanka

Við lok viðskipta í Kauphöll Íslands í gær var Landsbankinn talinn verðmætari en Íslandsbanki. Þetta er í fyrsta sinn sem markaðsverðmæti Landsbankans er hærra en Íslandsbanka í lok dags þótt sú staða hafi nokkrum sinnum áður komið upp innan viðskiptadags. Landsbankinn er nú metinn á 121,5 milljarða króna, sem er 120 milljónum króna meira en markaðsverðmæti Íslandsbanka. Verðhækkun á Landsbankanum hefur verið ævintýraleg á síðustu misserum og svo virðist sem ekki sé lát á þeirri þróun. Í afkomuspá greiningardeildar Íslandsbanka, sem kom út á þriðjudag, er bréfum í Landsbankanum spáð áframhaldandi hækkun umfram hækkun annarra hlutabréfa. Líklegt er að þessi bjartsýna spá Íslandsbanka hafi að hluta til valdið því að Landsbankinn hækkaði um 6,38 prósent á markaði í gær. Í upphafi árs var Landsbankinn metinn á 43,5 milljarða króna en Íslandsbanki á 67,2 milljarða. Síðan þá hefur markaðsvirði Landsbankans hækkað um 179 prósent en Íslandsbanka um 81 prósent.