Moss sendir frá sér afkomuviðvörun

Moss Bros hefur gefið út afkomuviðvörun þar sem segir að hagnaður félagsins á rekstrarárinu sem er að ljúka muni dragast töluvert saman á milli ára, jafnvel þótt afkoma af óreglulegum liðum aukist.

Fram kemur að sala þessa þriðja stærsta herrafatasala Bretlandseyja hafði aukist um eitt prósent á milli ára miðað við fyrstu 49 vikur rekstrarársins sem lauk 6. janúar. Þegar einungis er horft til innri vaxtar dróst velta saman um 1,4 prósent.

Vegna hlýindanna í Bretlandi á haustdögum dró úr sölu á þykkum frökkum og vetrarfatnaði. „Ég held að það sé liðin tíð að tala um kuldakafla í nóvember og desember," segir forstjórinn Philip Mountford í Guardian. Stjórnendur segja að þrátt fyrir erfitt rekstrarumhverfi í breskri smásölu muni þeir halda ótrauðir áfram að stækka félagið og endurbæta verslanir.

Moss er að stærstum hluta í eigu Unity, fjárfestingafélags í eigu Baugs, FL Group og Kevins Stanford. Baugur hefur verið orðaður við yfirtöku á Moss, eins og stofnendur félagsins - Moss fjölskyldan og fjárfestingasjóðurinn Dawnay Day.