Enn eitt tapið hjá Akureyri

Akureyri er enn án sigurs í Olís-deild karla eftir fjóra leiki. Leikur liðsins hrundi í síðari hálfleik í kvöld.

Í kvöld tapaði liðið á heimavelli, 24-30, gegn Aftureldingu. Þetta var þriðji sigur Aftureldingar í fjórum leikjum.

Jafnt var á með liðunum í leikhléi en í síðari hálfleik sigldu Mosfellingar fram úr og lönduðu stórum sigri.

Mikk Pinnonen fór mikinn í liði Mosfellinga og skoraði átta mörk. Birkir Benediktsson og Árni Bragi Eyjólfsson skoruðu báðir fjögur mörk.

Kristján Jóhannsson skoraði sex mörk fyrir Akureyri og Karolis Stropus fimm.