Handbolti

Arnór Þór á­fram í her­búðum Bergischer

Runólfur Trausti Þórhallsson skrifar
Arnór Þór verður áfram í herbúðum Bergischer.
Arnór Þór verður áfram í herbúðum Bergischer. DeFodi Images/Getty Images

Arnór Þór Gunnarsson, hægri hornamaður íslenska landsliðsins sem og þýska úrvalsdeildarliðsins Bergischer, hefur framlengt samning sinn við þýska liðið.

Samningur Arnórs Þórs rennur út í næsta vor og var hinn 33 ára Akureyringur farinn að íhuga að snúa heim á leið. Hann ákvað hins vegar á endanum að framlengja samning sinn í Þýskalandi til tveggja ára þó hann geti sagt samningnum upp sumarið 2022.

Þetta kom fram í viðtali íslenska landsliðsmanninn við Akureyri.net.

„Ég var nánast ákveðinn - fyrir um það bil tveimur mánuðum - að segja þetta gott næsta vor. Ég hef verið slæmur í mjöðm í eitt og hálft ár og hafði farið í alls konar athuganir og sneiðmyndatöku, og alltaf var sagt að þetta væru bara bólgur,“ sagði Arnór Þór í viðtalinu.

Þegar ég fór í röntgenmyndatöku kom í ljós að brjósk í mjaðmarbeini er byrjað að eyðast og þess vegna myndast þessar bólgur. Stundum var ég svo slæmur eftir æfingar og leiki að ég gat varla gengið.“

Breytt mataræði skipt sköpum

„Ég talaði við Crossfit-mann heima á Íslandi og hann gaf mér góð ráð. Ég var borða of lítið og hlutföllin í fæðunni voru ekki rétt að hans mati. Fór að hans ráðum og átta vikum seinna voru verkirnir nánast horfnir.“

„Ég hafði verið í sjúkraþjálfun en það breytti litlu en nú er mjöðmin orðin miklu betri. Ég er nánast verkjalaus. þó ég finni auðvitað enn smávegis til eru verkirnir hundraðfalt minni en áður,“ sagði Arnór Þór að lokum.

Bergischer er sem stendur í 8. sæti þýsku úrvalsdeildarinnar eftir 15 leiki. Liðið hefur unnið sjö, gert tvö jafntefli og tapað sex leikjum. Arnór Þór hefur skorað 50 mörk það sem af er tímabili.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.