„Ísland spilar ferskan og hraðan fótbolta“

Auk Þýskalands og Íslands eru Rúmenía, Norður-Makedónía, Armenía og Liechtenstein í J-riðli undankeppninnar.

„Þetta er mjög áhugavert yfirhöfuð. Það er ljóst að við erum sigurstranglegasta liðið í riðlinum og að sjálfsögðu er markmið okkar að vinna hann. Ég tel þetta áhugaverðan riðil með Íslandi, Rúmeníu og hinum liðunum en við erum líklegastir til afreka,“ sagði Löw eftir dráttinn.

Þjóðverjinn hrósaði íslenska liðinu fyrir þann árangur sem það hefur náð á síðustu árum.

„Ísland hefur stolið senunni á stórmótum á undanförnum árum. Alltaf þegar þeir spiluðu var frábær stemmning á vellinum. Þetta er mjög skipulagt lið sem spilar ferskan og hraðan fótbolta,“ sagði Löw.

„Rúmenar eru með mjög ungt lið og margir þeirra léku á EM U-21 árs liða þar sem þeir komust í undanúrslit. Þeir eru með mjög góða leikmenn.“

Efsta liðið í hverjum riðli í undankeppninni kemst beint á HM í Katar en liðin í 2. sæti fara í umspil. Evrópa á alls þrettán sæti á HM 2022 sem síðasta heimsmeistaramótið með 32 liðum.