Arnar Helgi og Hildur Helga ráðin til Aton.JL

Arnar Helgi Garðarsson og Hildur Helga Jóhannsdóttir hafa verið ráðin til starfa sem hönnuðir hjá Aton.JL.

Í tilkynningu kemur fram að þau séu bæði með BA gráðu í grafískri hönnun frá Listaháskóla Íslands.

„Hildur Helga útskrifaðist frá LHÍ nú í vor og var lokaverkefni hennar tímaritið Æsa, sem fjallaði um nornir og snerti á ýmsum flötum hönnunar, sögu og afþreyingar. Áður stundaði Hildur Helga nám í Myndlistaskóla Reykjavíkur og vann hlutastörf með skóla.

Arnar Helgi hefur töluverða reynslu af vinnu við hreyfðar sjónvarpsauglýsingar en hefur starfað að mestu sjálfstætt síðustu ár við auglýsingagerð. Hann hefur meðal annars unnið í Þjóðleikhúsinu, gert skjágrafík og skjáauglýsingar fyrir RÚV og Sjónvarp Símans sem og gert kynningarefni fyrir DV, Fréttablaðið og BYKO,“ segir í tilkynningunni.