Newcastle sótti stig í greipar Úlfanna

Newcastle sótti sterkt stig á útivelli þegar liðið heimsótti Wolverhampton Wanderers í öðrum leik dagsins í ensku úrvalsdeildinni í fótbolta.

Wolves stjórnaði leiknum stærstan hluta leiksins en ekkert mark var skorað fyrr en á 80.mínútu þegar Raul Jimenez skaut föstu skoti utan vítateigs sem Karl Darlow, markvörður Newcastle, réði ekki við.

Á lokamínútu venjulegs leiktíma tókst gestunum að jafna en jöfnunarmarkið kom úr óvæntri átt. Jacob Murphy gerði sér lítið fyrir og skoraði beint úr aukaspyrnu en markið verður að skrifast á Rui Patricio, markvörð Úlfanna.

Fleiri urðu mörkin ekki. Lokatölur 1-1. Úlfarnir með 10 stig í sjöunda sæti en Newcastle er með tveimur stigum minna í fjórtánda sæti.