Handbolti

Mikil blóðtaka fyrir Fram: Hafdís Renötudóttir farin út til Lugi

Óskar Ófeigur Jónsson skrifar
Hafdís Renötudóttir varð bæði bikarmeistari og deildarmeistari með liðinu sem átti frábært tímabil sem þó endaði snögglega vegna heimsfaraldursins
Hafdís Renötudóttir varð bæði bikarmeistari og deildarmeistari með liðinu sem átti frábært tímabil sem þó endaði snögglega vegna heimsfaraldursins Fram

Landsliðsmarkvörðurinn Hafdís Renötudóttir hefur skipt yfir til sænska félagsins Lugi HF en hún hefur ekkert spilað með Fram á tímabilinu til þessa vegna höfuðmeiðsla.

„Ljóst er að þetta er mikil blóðtaka fyrir okkur í Fram að missa besta markmann landsins úr okkar röðum en það er stefna okkar að styðja okkar leikmenn til atvinnumennsku erlendis og þannig stuðla að vexti þeirra sem leikmenn og jafnframt sem einstaklingar,“ segir í frétt á fésbókarsíðu Fram.

Handknattleiksdeild Fram hefur því samþykkt félagaskipti Hafdísar Renötudóttur til sænska félagsins.

Hafdís er 23 ára og uppalin í Fram en hún kom heim eftir nokkur ár í atvinnumennsku haustið 2019 og lék með Fram á síðasta tímabili og var þá lykilmaður í liði deildar- og bikarmeistaranna.

Hafdís var með hæstu hlutfallsmarkvörslu allra markvarða Olís-deildar kvenna á síðasta tímabili samkvæmt HB statz en hún hefur einnig leikið stórt hlutverk í landsliði okkar Íslendinga á síðustu árum.

Ástrós Anna Bender og Katrín Ósk Magnúsdóttir hafa staðið í marki Fram í fyrstu þremur umferðunum þar sem að Hafdís Renötudóttir hefur ekki getað spilað vegna höfuðmeiðsla.

Hafdís Renötudóttir til Lugi HF




Fleiri fréttir

Sjá meira


×